પાકિસ્તાનના ભૂતપૂર્વ ઝડપી બોલર શોએબ અખ્તર ફરી એકવાર વિવાદમાં ફસાયા છે. પાકિસ્તાનના જાણીતા ક્રિકેટ ઇતિહાસકાર, લેખક અને ટેલિવિઝન વ્યક્તિત્વ ડા. નૌમાન નિયાઝે ભૂતપૂર્વ ઝડપી બોલર શોએબ અખ્તરને નોટિસ મોકલી છે, જેમાં તેમના પર બદનામ કરવાનો આરોપ લગાવ્યો છે. સરકારી માલિકીના પાકિસ્તાન ટેલિવિઝન નેટવર્કના ભૂતપૂર્વ રમત નિર્દેશક ડા. નિયાઝે તેમના વકીલ દ્વારા આ નોટિસ મોકલી છે.
પાકિસ્તાન ટીમ સાથેના કાર્યકાળ ટ્ઠદરમિયાન શોએબ અખ્તરે તેમને ‘કિટ મેન’ ગણાવ્યા હતા. અખ્તરે એક પોડકાસ્ટ પર કહ્યું હતું કે ડા. નિયાઝ મૂળભૂત રીતે ટીમમાં અમારા માટે બેગ અને સામાન લઈ જતા હતા. જ્યારે અખ્તર પાકિસ્તાન ટીમ માટે રમતા હતા, ત્યારે ડા. નિયાઝે કેટલાક પ્રવાસોમાં પાકિસ્તાન ટીમ માટે ડેટા એનાલિસ્ટ તરીકે કામ કર્યું હતું. અખ્તરે ટીમમાં કોચ અને મેનેજરોની ભૂમિકાની ટીકા કરી હતી અને જણાવ્યું હતું કે ડા. નિયાઝ ખેલાડીઓની બેગ કેવી રીતે લઈ જવા માટે ટીમમાં હતા. તેમણે કહ્યું કે તેમણે ટીમમાં આ કામ કર્યું હતું. મને તેમના અન્ય કોઈ કામની ખબર નથી.
આ નોટિસમાં, નૌમાન નિયાઝના વકીલે ૧૪ દિવસની અંદર બિનશરતી માફી માંગી છે. જો તેઓ આમ નહીં કરે, તો તેમણે કાનૂની કાર્યવાહી અને નુકસાનનો સામનો કરવા તૈયાર રહેવું પડશે. આ બંને વચ્ચે પહેલા પણ ઘર્ષણ થયું છે. ઇમરાન ખાનની સરકાર દરમિયાન, ડા. નિયાઝે નાના વિવાદ બાદ અખ્તરને પીટીવી પર લાઇવ શો છોડી દેવા કહ્યું હતું. એક મંત્રીના હસ્તક્ષેપ પર, તેમણે પાછળથી આ ઝડપી બોલરની માફી માંગી અને પછી બંનેએ વિવાદ ઉકેલી દીધો.
શોએબ અખ્તરની ગણતરી વિશ્વના ઘાતક બોલરોમાં થાય છે અને તેમણે પાકિસ્તાન માટે ત્રણેય ફોર્મેટમાં ક્રિકેટ રમ્યું છે. તેમના નામે ૪૬ ટેસ્ટ મેચોમાં ૧૭૮ વિકેટ, ૧૬૩ વનડે મેચોમાં ૨૪૭ વિકેટ અને ૧૫ ટી૨૦ આંતરરાષ્ટ્રીય મેચોમાં કુલ ૧૯ વિકેટ છે.
