સોમવારે રાજ્યસભામાં પહલગામ આતંકવાદી હુમલાનો મુદ્દો ગરમાયો. રાજ્યસભામાં વિપક્ષના નેતા મલ્લીકાર્જુન ખડગેએ ૨૨ એપ્રિલના રોજ થયેલા હુમલા અંગે સરકારને તીખા પ્રશ્નો પૂછ્યા. મલ્લીકાર્જુન ખડગેએ નિયમ ૨૬૭ હેઠળ ચર્ચાની માંગ કરી અને કહ્યું કે પહેલગામ હુમલાના આતંકવાદીઓ અત્યાર સુધી પકડાયા નથી કે માર્યા ગયા નથી. તેમણે જમ્મુ અને કાશ્મીરના લેફ્ટનન્ટ ગવર્નરના નિવેદનને ટાંકીને ગુપ્તચર નિષ્ફળતાનો આરોપ લગાવ્યો. કોંગ્રેસ અધ્યક્ષે કહ્યું કે ઉપરાજ્યપાલે સ્વીકાર્યું કે ગુપ્તચર નિષ્ફળતા હતી. અમને માહિતી આપવી જોઈએ.
તે જ સમયે, મલ્લીકાર્જુન ખડગેએ યુએસ રાષ્ટ્રપતિ ડોનાલ્ડ ટ્રમ્પના નિવેદન પર સરકારને ઘેરી લીધી. તેમણે કહ્યું કે ટ્રમ્પે ૨૪ વાર કહ્યું કે ભારત- પાકિસ્તાન યુદ્ધ મારા હસ્તક્ષેપને કારણે સમાપ્ત થયું. આ દેશ માટે અપમાનજનક છે. તેમણે કહ્યું કે તમે દુનિયાને જે કંઈ કહ્યું, અમને કહ્યું, ભારતના લોકોને ‘ઓપરેશન સિંદૂર’ વિશે કહ્યું, તે પછી અમને માહિતી આપવી જોઈએ.
મલ્લીકાર્જુન ખડગેની માંગ પર, ગૃહના નેતા જેપી નડ્ડાએ કહ્યું કે એવો સંદેશ ન જવો જોઈએ કે સરકાર ‘ઓપરેશન સિંદૂર’ પર ચર્ચા કરવા માંગતી નથી. સરકાર તેના પર ચર્ચા કરવા માટે સંપૂર્ણપણે તૈયાર છે. તેમણે કહ્યું કે અમે બિઝનેસ એડવાઇઝરી કમિટીમાં સમય ફાળવવાનો પ્રસ્તાવ મૂક્યો છે. અમે દરેક મુદ્દા પર ચર્ચા કરવા માટે સંપૂર્ણપણે તૈયાર છીએ. ઓપરેશન સિંદૂરના આઠ દિવસમાં જે બન્યું તે આઝાદી પછી દેશમાં કોઈપણ ઓપરેશન દરમિયાન ક્યારેય બન્યું ન હતું. તેમણે કહ્યું કે તેઓ ઇતિહાસમાં જવા માંગતા નથી.
ખડગેએ કહ્યું કે ‘સરકારે પહેલગામ હુમલામાં સુરક્ષામાં બેદરકારી દાખવી હતી અને ખુદ ઉપરાજ્યપાલે આ સ્વીકાર્યું છે. આ સાથે, ઘણા વરિષ્ઠ લશ્કરી અધિકારીઓએ પણ ઘણા ખુલાસા કર્યા. આવી સ્થિતિમાં, સરકારે અમને જાણ કરવી જોઈએ. યુએસ પ્રમુખ ટ્રમ્પે ૨૪ વખત કહ્યું કે મારી મધ્યસ્થીથી કરાર થયા પછી જ ભારત-પાકિસ્તાન સંઘર્ષ બંધ થયો. દેશ માટે અપમાનજનક છે કે કોઈ બહારનો વ્યક્તિ આવો દાવો કરી રહ્યો છે.’
કોંગ્રેસ અધ્યક્ષ મલ્લીકાર્જુન ખડગેએ ઓપરેશન સિંદૂર અને પહેલગામ આતંકવાદી હુમલાના મુદ્દા પર સરકારને ઘેરવાનો પ્રયાસ કર્યો હતો, જેનો ભાજપ અધ્યક્ષ અને ગૃહના નેતા જેપી નડ્ડાએ પણ જોરદાર જવાબ આપ્યો હતો.
આના પર, ગૃહના નેતા અને ભાજપ અધ્યક્ષ જેપી નડ્ડાએ કહ્યું કે ‘આ ગૃહ દ્વારા દેશમાં આ સંદેશ ન જવો જોઈએ કે અમે ઓપરેશન સિંદૂર પર ચર્ચા કરવા માંગતા નથી, અમે ચર્ચા કરીશું અને આ મુદ્દા પર બધું ગૃહના ટેબલ પર મૂકવામાં આવશે. હું એ પણ કહેવા માંગુ છું કે દેશની સ્વતંત્રતા પછી, આજ સુધી, દેશમાં આવું ઓપરેશન થયું નથી, જેમ કે વડા પ્રધાનના નેતૃત્વમાં ઓપરેશન સિંદૂરમાં થયું હતું. ઓપરેશન સિંદૂર પર ચર્ચા માટે ગૃહમાં નોટિસ આપવામાં આવી છે અને ગમે તે સમય નક્કી થશે, સરકાર તેના પર ચર્ચા કરશે અને દરેક પ્રશ્નનો જવાબ આપવામાં આવશે.
