નવા વર્ષની ઉજવણી માટે ગુલમર્ગ, સોનમર્ગ અને પહેલગામ સહિત કાશ્મીરના તમામ પ્રવાસન સ્થળોએ પ્રવાસીઓ ઉમટી પડ્યા હતા. પર્વતોમાં હિમવર્ષા અને મેદાનોમાં ઠંડીનો આનંદ માણતા પ્રવાસીઓએ નવા વર્ષની ઉજવણી કરી. આ દરમિયાન સુરક્ષા વ્યવસ્થા પણ ખૂબ જ કડક હતી. દાલ તળાવના કિનારે ધુમ્મસ વચ્ચે પ્રવાસીઓ શિકારા રાઇડ્સ લેતા જાવા મળ્યા હતા. બુધવારે વાદળછાયું વાતાવરણ હતું અને ઠંડી પણ તીવ્ર હતી. દરમિયાન, લાલ ચોકમાં ક્લોક ટાવર પર પ્રવાસીઓની ભીડ હતી. સાંજ સુધીમાં, લાલ ચોક પર ભીડ વધી ગઈ હતી, જે રાત સુધી રહી. પ્રવાસીઓ સેલ્ફી લેતા, ફોટા ક્લિક કરતા અને ઠંડીમાં આઈસ્ક્રીમનો આનંદ માણતા જાવા મળ્યા હતા.
દિલ્હીના એક પ્રવાસી પરિવારે તેને અભૂતપૂર્વ ગણાવ્યું. તેમના કૂતરા સાથે આવેલા પરિવારે કહ્યું કે કાશ્મીરમાં આ તેમનો પહેલો અનુભવ હતો. તે એક અદ્ભુત અનુભવ હતો. તેમણે સાંભળ્યું હતું તેમ કોઈ ડર નહોતો, અને દરેક વ્યક્તિ આરામથી ફરતા હતા. સુરક્ષા વ્યવસ્થા પણ ખૂબ જ કડક દેખાતી હતી.
ગુલમર્ગમાં પણ ખૂબ ભીડ હતી. નવા વર્ષની પૂર્વ સંધ્યાએ આ વિસ્તારમાં પ્રવાસીઓ ઉમટી પડ્યા હતા. બરફવર્ષા પછી, અહીં ઘણો બરફ પડ્યો હતો, અને લોકો ગોંડોલા ફેઝ વન પર સ્કીઇંગનો આનંદ માણતા જાવા મળ્યા હતા. ઘણા પ્રવાસીઓએ સોનમર્ગની મુલાકાત પણ લીધી હતી. પ્રવાસન વિભાગ પહેલગામમાં એક ખાસ કાર્યક્રમનું આયોજન કરી રહ્યું છે, અને પ્રવાસીઓ કલાકારોના પ્રદર્શન પર નાચતા જાવા મળ્યા હતા.
સુરક્ષા દળોએ સવારથી જ કડક નિરીક્ષણ અભિયાન હાથ ધર્યું હતું, વાહનોનું ચેકિંગ કર્યું હતું. કાશ્મીર હાઇવે ઉપરાંત, આંતરિક વિસ્તારો અને પ્રવાસન સ્થળોએ સુરક્ષા કડક હતી. પ્રવાસીઓને અસુવિધા ન થાય તે માટે રાત્રે લાલ ચોક ખાતે ક્લોક ટાવરની આસપાસ વાહનો પાર્ક કરવાની મંજૂરી આપવામાં આવી ન હતી.
