ઉપાધ્યક્ષ પદ પરથી જગદીપ ધનખરના રાજીનામા પછી, દેશની રાજનીતિ સંપૂર્ણપણે બદલાઈ ગઈ છે. ધનખરના રાજીનામાની ચર્ચા દરેક જગ્યાએ થઈ રહી છે. રાષ્ટ્રપતિ દ્રૌપદી મુર્મુએ મંગળવારે ધનખરનું રાજીનામું સ્વીકારી લીધું હતું, જ્યારે બીજી તરફ ગૃહ મંત્રાલયે પણ આ અંગે એક સૂચના જારી કરી છે. રાજીનામા વચ્ચે, બિહારના મુખ્યમંત્રી નીતિશ કુમાર પણ અચાનક ચર્ચામાં આવી ગયા છે.
દિલ્હીમાં ઉપરાષ્ટ્રપતિના રાજીનામાથી બિહારમાં સૌથી વધુ ખળભળાટ મચી ગયો છે. અહીંના મુખ્ય વિપક્ષી પક્ષ, રાષ્ટ્રીય જનતા દળે દાવો કર્યો હતો કે ઉપરાષ્ટ્રપતિ જગદીપ ધનખરનું રાજીનામું ભારતીય જનતા પાર્ટી દ્વારા ઘડાયેલ ષડયંત્ર છે, જેનો ઉદ્દેશ્ય બિહારમાં વિધાનસભા ચૂંટણી પહેલા મુખ્યમંત્રી નીતિશ કુમારને દૂર કરવાનો છે.
જાકે, નીતિશ કુમારના નજીકના સહાયક અને મંત્રી શ્રવણ કુમાર, જેમના નામે રાજ્યમાં સૌથી લાંબા સમય સુધી મુખ્યમંત્રી રહેવાનો રેકોર્ડ છે, તેમણે આવા કોઈપણ દાવાને નકારી કાઢ્યો. તેમનું કહેવું છે કે ઓક્ટોબર-નવેમ્બરમાં યોજાનારી વિધાનસભા ચૂંટણી માટે નીતિશને એનડીએનો ચહેરો જાહેર કરવામાં આવ્યો છે.
ઉપરાષ્ટ્રપતિ પદ માટે નીતિશ કુમારના નામનો ઉલ્લેખ કરતા, બિહાર વિધાનસભામાં રાજદના મુખ્ય દંડક અખ્તરુલ ઇસ્લામ શાહીનએ દાવો કર્યો હતો કે, “લાંબા સમયથી ભાજપ નીતિશને દૂર કરવાનો પ્રયાસ કરી રહી હતી જેથી તેઓ અહીં પોતાના મુખ્યમંત્રી બનાવી શકે. બિહારમાં વિધાનસભા ચૂંટણી પહેલા જ તેઓ ભયાવહ બની ગયા છે, જેમાં એનડીએનો પરાજય નિશ્ચિત છે.”
આરજેડી નેતા શાહીનએ દાવો કર્યો હતો કે, “ભાજપના ઘણા વરિષ્ઠ નેતાઓ લાંબા સમયથી નીતિશને હટાવવાની તરફેણમાં બોલી રહ્યા છે. ભૂતપૂર્વ કેન્દ્રીય મંત્રી અશ્વિની કુમાર ચૌબેએ એક વખત નીતિશને નાયબ વડા પ્રધાન બનાવવાની હિમાયત પણ કરી હતી. તેથી, એવું નક્કી કરવું ખોટું નહીં હોય કે ધનખરનું રાજીનામું ભાજપનું ષડયંત્ર છે, જેનો ઉદ્દેશ્ય નીતિશ કુમારને ઉપરાષ્ટ્રપતિ જેવું રાજકીય રીતે મહત્વપૂર્ણ પદ આપીને તેમને હટાવવાનો છે.” તેવી જ રીતે, ભૂતપૂર્વ નાયબ મુખ્ય પ્રધાન અને દિવંગત નેતા સુશીલ કુમાર મોદીએ એક વખત દાવો કર્યો હતો કે નીતિશ કુમાર ઉપરાષ્ટ્રપતિ પદ માટે લોબિંગ કરી રહ્યા હતા અને જ્યારે લોકસભામાં બહુમતી ધરાવતી ભાજપે જનતા દળ યુનાઈટેડના પ્રમુખને આ પદ આપવાનો ઇનકાર કર્યો હતો, ત્યારે તેઓ એનડીએમાંથી બહાર નીકળી ગયા હતા.
નીતિશે ૨૦૨૨માં ભાજપ સાથેના સંબંધો તોડી નાખ્યા હતા અને તેના પર જેડીયુ તોડવાનું કાવતરું કરવાનો આરોપ લગાવ્યો હતો, પરંતુ ગયા વર્ષે લોકસભા ચૂંટણીના થોડા સમય પહેલા, તેમણે પોતાનો વિચાર બદલી નાખ્યો અને ફરીથી એનડીએ સાથે જાડાણ કર્યું. ચૂંટણી પછી જદયુએ સારું પ્રદર્શન કર્યું અને પાર્ટી એનડીએ માં એક મહત્વપૂર્ણ સાથી બની ગઈ કારણ કે કેન્દ્રમાં સત્તામાં રહેવા માટે ભાજપને હંમેશા જદયુના ટેકાની જરૂર પડશે. દરમિયાન, જનતા દળ યુનાઇટેડના વરિષ્ઠ નેતા શ્રવણ કુમારે રાજદ નેતાના દાવા પર નારાજગી વ્યક્ત કરી. તેમણે કહ્યું, “નીતીશ બિહાર છોડવાનો કોઈ પ્રશ્ન જ નથી. તેઓ અહીં જ રહેશે, અને વિધાનસભા ચૂંટણીમાં એનડીએને મોટી જીત અપાવશે. તેઓ બિહારના લોકોની સેવા કરતા બીજા કાર્યકાળ પણ પૂર્ણ કરશે.”
અગાઉ, ઉપરાષ્ટ્રપતિ ધનખડે ગઈકાલે સોમવારે સાંજે સ્વાસ્થ્યના કારણોસર પોતાના પદ પરથી રાજીનામું આપીને બધાને આશ્ચર્યચકિત કરી દીધા હતા. તેમણે રાષ્ટ્રપતિ દ્રૌપદી મુર્મુને પોતાનું રાજીનામું મોકલી દીધું હતું અને કહ્યું હતું કે તેઓ તાત્કાલિક અસરથી પદ છોડી રહ્યા છે. જાકે, અચાનક રાજીનામા અંગે વિપક્ષમાં ઘણી વાતો કહેવામાં આવી રહી છે.
