ભારત અને ઇંગ્લેન્ડ વચ્ચે ચાલી રહેલી લોર્ડ્સ ટેસ્ટ મેચમાં ઉત્સાહ ચરમસીમાએ પહોંચી ગયો છે. ત્રીજી ટેસ્ટ મેચનો ચોથો દિવસ રોમાંચ અને ઉતાર-ચઢાવથી ભરેલો રહ્યો. ભારતીય ઓલરાઉન્ડર વોશિંગ્ટન સુંદરે શાનદાર બોલિંગ કરી, ચાર મહત્વપૂર્ણ વિકેટો લીધી અને ભારતને મેચમાં મજબૂત સ્થિતિમાં પહોંચાડ્યું. ઇંગ્લેન્ડના બીજા દાવને સસ્તામાં આઉટ કરીને, ભારતે વિજય માટે ૧૯૩ રનનો લક્ષ્યાંક હાંસલ કર્યો, પરંતુ તેના જવાબમાં, ભારતીય બેટ્સમેનોની શરૂઆત ખૂબ જ નબળી રહી.
૧૯૩ રનના લક્ષ્યાંકનો પીછો કરવા ઉતરેલી ભારતીય ટીમની શરૂઆત ખૂબ જ નિરાશાજનક રહી. બીજી જ ઓવરમાં ઓપનર યશસ્વી જયસ્વાલ ખાતું ખોલ્યા વિના પેવેલિયન પરત ફર્યા. આ પછી, કરુણ નાયરે ૧૪ રન બનાવ્યા, પરંતુ તે પણ લાંબી ઇનિંગ રમી શક્યો નહીં. કેપ્ટન શુભમન ગિલ પાસેથી ઘણી અપેક્ષાઓ હતી, પરંતુ તે પણ ફક્ત ૬ રન બનાવીને બ્રાઇડન કાર્સનો શિકાર બન્યો. નાઇટ વોચમેન તરીકે મોકલવામાં આવેલ આકાશ દીપ લાંબો સમય ટકી શક્યો નહીં અને બેન સ્ટોક્સે તેને પેવેલિયનનો રસ્તો બતાવ્યો.દિવસની રમતના અંત સુધીમાં, ભારતે ૪ વિકેટ ગુમાવીને ૫૮ રન બનાવી લીધા હતા. ભારતને જીતવા માટે હજુ પણ ૧૩૫ રનની જરૂર છે, જ્યારે ઇંગ્લેન્ડને શ્રેણીમાં લીડ મેળવવા માટે ૬ વિકેટ લેવાની રહેશે. ઇંગ્લેન્ડની ટીમ ઐતિહાસિક મેદાન પર ભારતને ઓછા સ્કોર સુધી મર્યાદિત રાખવા અને મેચ જીતવાનો પ્રયાસ કરશે. પરંતુ પ્રશ્ન એ છે કે, શું લોર્ડ્સ જેવી પીચ પર ૨૦૦ થી ઓછા રનના લક્ષ્યનો બચાવ કરવો શક્ય છે? ખરેખર, ટેસ્ટ ક્રિકેટના લાંબા ઇતિહાસમાં, લોર્ડ્સ ગ્રાઉન્ડ પર એવા થોડા જ પ્રસંગો બન્યા છે જ્યારે કોઈ ટીમે ૨૦૦ કે તેથી ઓછા રનના લક્ષ્યનો સફળતાપૂર્વક બચાવ કર્યો હોય. ચાલો જાણીએ કે અત્યાર સુધી આવું ક્યારે બન્યું છેઃ
અત્યાર સુધી, લોર્ડ્સ પર ૨૦૦ થી ઓછા રનના લક્ષ્યનો બચાવ ફક્ત ત્રણ વખત થયો છે અને ત્રણમાંથી, યજમાન ઇંગ્લેન્ડે આ સિદ્ધિ ૨ વખત મેળવી છે. ૧૮૮૮માં ઓસ્ટ્રેલિયા અને ઇંગ્લેન્ડ વચ્ચે રમાયેલી ટેસ્ટ મેચમાં આવું પહેલીવાર બન્યું હતું. ઓસ્ટ્રેલિયાએ ઇંગ્લેન્ડ સામે ૧૨૪ રનનો બચાવ કર્યો હતો. આ પછી, ૧૯૫૫માં, ઇંગ્લેન્ડે દક્ષિણ આફ્રિકા સામે ૧૮૩ રનના લક્ષ્યનો બચાવ કર્યો હતો. છેલ્લે ૨૦૧૯માં અહીં ૨૦૦ રનથી ઓછા રનના લક્ષ્યનો બચાવ થયો હતો. ત્યારબાદ ઇંગ્લેન્ડે આયર્લેન્ડ સામે આ સિદ્ધિ મેળવી હતી.
હવે એ જાવાનું રસપ્રદ રહેશે કે શું ઇંગ્લેન્ડ ફરી એકવાર લોર્ડ્સમાં ૨૦૦ રનથી ઓછાના લક્ષ્યનો બચાવ કરી શકશે કે પછી ટીમ ઇન્ડિયા આ મેચ જીતીને ઇતિહાસ રચશે. લોર્ડ્સની પીચ પર બેટિંગ કરવી સમય જતાં મુશ્કેલ બની જાય છે. બોલરોને અહીં બાઉન્સ અને સ્વિંગ બંનેનો લાભ મળે છે. આવી સ્થિતિમાં, આ મેચ બંને ટીમો માટે નિર્ણાયક સાબિત થઈ શકે છે. જા ભારત જીતે છે, તો તે લોર્ડ્સમાં વધુ એક ઐતિહાસિક જીત નોંધાવશે, જ્યારે ઇંગ્લેન્ડ પાસે તેના હોમ ગ્રાઉન્ડ પર ૨૦૦ રનથી ઓછાના લક્ષ્યનો બચાવ કરવાનો ચોથો મોકો હશે.
નોંધનીય છે કે ભારતે અત્યાર સુધીમાં લોર્ડ્સમાં ૧૯ ટેસ્ટ મેચ રમી છે, જેમાંથી ૩ જીતી છે, ૧૨ હારી છે અને ૪ મેચ ડ્રો રહી છે. હવે બધાની નજર તેના પર છે કે શુબમન ગિલની કેપ્ટનશીપ હેઠળ ટીમ ઈન્ડિયા આ ઐતિહાસિક મેદાન પર બીજી યાદગાર જીત હાંસલ કરી શકશે કે નહીં.
