પ્રખ્યાત ટેલિવિઝન અભિનેત્રી દીપિકા કક્કર લાંબા સમયથી ગંભીર બીમારી સામે ઝઝૂમી રહી હતી. લીવર કેન્સર સામે લડ્યા પછી, અભિનેત્રીને સારવાર દરમિયાન અચાનક અસ્વસ્થતાનો અનુભવ થયો અને ખબર પડી કે તેના શરીરમાં એક નવી ગાંઠ બની ગઈ છે. ડોક્ટરોએ કોઈ પણ વિલંબ કર્યા વિના બીજી સર્જરીનું આયોજન કર્યું, જે સફળ રહ્યું. સર્જરી પહેલા દીપિકાને ખૂબ દુખાવો થતો હતો, અને તેના પતિએ જણાવ્યું હતું કે તેણી હજુ પણ થોડી પીડા અનુભવી રહી છે. અભિનેત્રીના પતિ, અભિનેતા શોએબ ઇબ્રાહિમે સોશિયલ મીડિયા દ્વારા પુષ્ટિ આપી હતી કે દીપિકાના પેટમાંથી ગાંઠ કાઢવાની પ્રક્રિયા સફળ રહી છે.
શોએબે ચાહકોનો આભાર માન્યો અને સમજાવ્યું કે દીપિકા હજુ પણ થોડી પીડામાં છે, તેમ છતાં તેની સ્થિતિ સ્થિર છે અને ચિંતા કરવાની કોઈ વાત નથી. સર્જરી પછી ડોક્ટરોએ તેને નિરીક્ષણ હેઠળ રાખી છે. આ પડકારજનક સમય દરમિયાન પણ, દંપતીએ તેમના ખાસ ક્ષણોને યાદ કરવામાં કોઈ કસર છોડી નથી. હોસ્પિટલ દાખલ થયા પહેલા, શોએબ અને દીપિકાએ તેમની ૮મી લગ્ન વર્ષગાંઠની ઉજવણી કરી. તેમના નવીનતમ યુટયુબ વ્લોગમાં, શોએબે શેર કર્યું કે તેઓએ રમઝાનના પવિત્ર મહિના દરમિયાન સાદગીથી કેવી રીતે ઉપવાસ તોડ્યા અને રસોડામાં સાથે સમય વિતાવ્યો. આ દરમિયાન, શોએબે દીપિકાને તેમની વર્ષગાંઠ પર અભિનંદન આપ્યા, ત્યારબાદ બંને બીજા દિવસે સર્જરી માટે હોસ્પિટલ જવા રવાના થયા.
દીપિકા છેલ્લા કેટલાક સમયથી સ્ટેજ ૨ લીવર કેન્સર નામની ગંભીર બીમારી સામે લડી રહી છે. ગયા વર્ષથી તેની સારવાર ચાલુ છે, જ્યારે તેણીએ જૂન ૨૦૨૫ માં ગાંઠ દૂર કરવા માટે તેની પહેલી મોટી સર્જરી કરાવી હતી. ત્યારથી, દીપિકા કીમોથેરાપી અને રિકવરીમાંથી પસાર થઈ રહી છે. આ મુશ્કેલ સફર દરમિયાન, તે તેના વ્લોગ્સ દ્વારા ચાહકો સાથે જાડાયેલી રહી છે, તેના સ્વાસ્થ્યના ઉતાર-ચઢાવને ખૂબ જ નિખાલસતા અને સકારાત્મકતા સાથે શેર કરી રહી છે.
દીપિકા અને શોએબ માટે, તેમના ચાહકો પરિવાર જેવા છે, તેથી જ તેઓ તેમની સ્વાસ્થ્ય યાત્રાનું વિગતવાર દસ્તાવેજીકરણ કરી રહ્યા છે. દીપિકા તેના યુટ્યુબ ચેનલ પર તેના કીમોથેરાપીના અનુભવો, તેની માનસિક સ્થિતિ અને રિકવરી તરફના તેના પગલાં વિશે વિગતો શેર કરે છે. શોએબ તેના વ્લોગ દ્વારા નિયમિત અપડેટ્સ પણ આપે છે, જેથી તેમના લાખો ચાહકો દીપિકાના સ્વાસ્થ્ય વિશે ખાતરી કરી શકે. હાલમાં, ચાહકો દીપિકાના ઝડપથી સ્વસ્થ થવા માટે પ્રાર્થના કરી રહ્યા છે.
