ગુજરાત કોંગ્રેસ દ્વારા સંગઠનને મજબૂત કરવા માટે એક સર્જન અભિયાન ચલાવવામાં આવી રહ્યું છે. તાજેતરમાં જિલ્લા પ્રમુખોની નિમણૂક કર્યા બાદ હવે પાર્ટીએ તાલુકા પ્રમુખોની પસંદગી પ્રક્રિયા હાથ ધરી છે. આ પ્રક્રિયા કોંગ્રેસ ભવન ખાતે ચાલી રહી છે, જ્યાં પ્રદેશના મુખ્ય નેતાઓ જિલ્લા પ્રમુખો અને પ્રભારીઓ સાથે બેઠકો યોજી રહ્યા છે.
ગુજરાત પ્રદેશ કોંગ્રેસ સમિતિના પ્રમુખ અમિત ચાવડા, વિધાનસભા કોંગ્રેસ પક્ષના નેતા તુષાર ચૌધરી અને સહપ્રભારી ઉષા નાયડુ આ બેઠકોનું નેતૃત્વ કરી રહ્યા છે. તેઓ વિવિધ જિલ્લાઓના પ્રમુખો અને પ્રભારીઓ સાથે વ્યક્તિગત રીતે ચર્ચા કરીને સ્થાનિક સ્તરે સંગઠનને વધુ સક્રિય અને મજબૂત બનાવવા માટે રણનીતિ ઘડી રહ્યા છે.
આ બેઠકોમાં ભરૂચ, છોટાઉદેપુર, નવસારી, તાપી, ડાંગ, વલસાડ, સુરત શહેર, સુરત જિલ્લો, નર્મદા અને આણંદ સહિત ૧૦ જિલ્લાના પ્રમુખો સાથે દિવસભર બેઠકો યોજવામાં આવી હતી. આ બેઠકોનો મુખ્ય ઉદ્દેશ્ય તાલુકા પ્રમુખોની પસંદગી પ્રક્રિયાને પારદર્શક અને સર્વસંમતિથી પૂર્ણ કરવાનો છે. પાર્ટીનો હેતુ છે કે એવા સક્ષમ અને લોકપ્રિય નેતાઓને તાલુકા પ્રમુખ તરીકે જવાબદારી સોંપવામાં આવે જેઓ સ્થાનિક સ્તરે પક્ષનો પ્રચાર-પ્રસાર કરી શકે અને જનતા સાથે સીધો સંપર્ક સ્થાપિત કરી શકે.
આગામી ત્રણ દિવસ સુધી આ પ્રક્રિયા ચાલુ રહેશે, જેમાં બાકીના જિલ્લાઓના પ્રમુખો સાથે પણ બેઠકો યોજાશે. કોંગ્રેસનું આ સંગઠન સર્જન અભિયાન આગામી ચૂંટણીઓને ધ્યાનમાં રાખીને ખૂબ જ મહત્વપૂર્ણ માનવામાં આવે છે. સંગઠનને તળિયાના સ્તરથી મજબૂત બનાવીને કોંગ્રેસ ગુજરાતમાં પોતાનું સ્થાન પુનઃ સ્થાપિત કરવાનો પ્રયાસ કરી રહી છે. આ પ્રક્રિયા કોંગ્રેસના કાર્યકર્તાઓમાં પણ નવો ઉત્સાહ અને જામ ભરી રહી છે.
