ગીરગઢડા તાલુકાના મહોબતપરા ગામ પાસેથી રાવલ નદીમાંથી એક સિંહનો મૃતદેહ ૨૩ ઓગસ્ટના રોજ મળી આવ્યો હતો. આ બનાવ અંગે વન વિભાગે અજાણ્યા લોકો વિરુદ્ધ ગુનો નોંધીને તપાસ હાથ ધરી હતી. પોલીસને મળેલી બાતમીના આધારે, વન વિભાગની ટીમે બે આરોપીઓ, મુકેશ બળદાણીયા અને કમલેશને ઝડપી પાડ્યા હતા. પૂછપરછ દરમિયાન, આરોપીઓએ કબૂલ્યું કે તેમણે નગડિયા ગામની સીમમાં પોતાની વાડીમાં મગફળી, કપાસ અને તુવેરના પાકને ફરતે લગાવેલા તારની વાડમાં વીજળીનો પ્રવાહ ચાલુ કર્યો હતો, જેના કારણે ૨૨ ઓગસ્ટની રાત્રે એક સિંહનું મૃત્યુ થયું હતું. આરોપીઓએ સિંહના મૃતદેહને ટ્રેક્ટરના પાછળના ભાગે મૂકીને રાવલ નદીના પુલ પરથી ફેંકી દીધો હતો. બન્ને આરોપીઓને ગીરગઢડા કોર્ટમાં રજૂ કરાયા હતા, જ્યાંથી તેમને એક દિવસના રિમાન્ડ પર મોકલવામાં આવ્યા બાદમાં, કોર્ટે તેમની જામીન અરજી નામંજૂર કરીને તેમને જૂનાગઢ જેલમાં મોકલી આપ્યા હતા.
