છત્તીસગઢના અબુઝમાદ વિસ્તારમાં સુરક્ષાદળો અને નક્સલવાદીઓ વચ્ચેની અથડામણમાં ચાર નક્સલવાદીઓ માર્યા ગયા છે. માર્યા ગયેલા નક્સલીઓના મૃતદેહ મળી આવ્યા છે. સુરક્ષા દળોએ આ એન્કાઉન્ટરમાં એકે-૪૭, એસએલઆર અને અન્ય ઓટોમેટિક હથિયારો પણ જપ્ત કર્યા છે. એન્કાઉન્ટરમાં દંતેવાડા ડીઆરજી હેડ કોન્સ્ટેબલ સન્નુ કરમ શહીદ થયા છે. હાલમાં, એન્કાઉન્ટર ચાલી રહ્યું છે અને ડીઆરજી(ડિસ્ટ્રીક્ટ રિઝર્વ ગાર્ડ) અને એસટીએફ (સ્પેશિયલ ટાસ્ક ફોર્સ)ના જવાનોને વિસ્તારમાં તૈનાત કરવામાં આવ્યા છે. આ ઓપરેશનમાં ૪ જિલ્લાના સુરક્ષા દળો સામેલ છે.
છત્તીસગઢના નક્સલ પ્રભાવિત નારાયણપુર અને દંતેવાડા જિલ્લાના સરહદી વિસ્તારમાં સુરક્ષા દળો અને નક્સલવાદીઓ વચ્ચે અથડામણ ચાલુ છે. પોલીસ અધિકારીઓના જણાવ્યા અનુસાર, અબુઝહમદ વિસ્તારમાં એન્કાઉન્ટર ચાલી રહ્યું છે, જે આ બે જિલ્લાના સરહદી વિસ્તાર પર સ્થિત છે. આઈજી બસ્તર પી સુંદરરાજે આ ઓપરેશન વિશે માહિતી આપતા કહ્યું કે સુરક્ષા દળો દ્વારા અબુઝહમદ વિસ્તારમાં નક્સલવાદીઓ વિરુદ્ધ સતત કાર્યવાહી કરવામાં આવી રહી છે.
પોલીસ અધિકારીઓએ જણાવ્યું હતું કે નક્સલ વિરોધી અભિયાનમાં, ડિસ્ટ્રીક્ટ રિઝર્વ ગાર્ડ અને સ્પેશિયલ ટાસ્ક ફોર્સની સંયુક્ત ટીમને અબુઝહમાદ વિસ્તારમાં મોકલવામાં આવી હતી. અથડામણ શરૂ થઈ જ્યારે સુરક્ષા દળો સાંજે ૬ઃ૦૦ વાગ્યાની આસપાસ વિસ્તારમાં પહોંચ્યા અને નક્સલીઓએ તેમના પર ગોળીબાર શરૂ કર્યો. આ પછી સુરક્ષાદળોએ પણ જવાબી કાર્યવાહી કરી હતી.
પોલીસ અધિકારીઓએ જણાવ્યું કે સુરક્ષા દળો અને નક્સલવાદીઓ વચ્ચે અથડામણ ચાલી રહી છે. પોલીસ અધિકારીઓનું કહેવું છે કે એન્કાઉન્ટરની સ્થિતિ વિશે વધુ માહિતી એકઠી કરવામાં આવી રહી છે અને સુરક્ષા દળો દ્વારા નક્સલવાદીઓ વિરુદ્ધ કડક કાર્યવાહી કરવામાં આવી રહી છે. આઈજી બસ્તર પી સુંદરજે કહ્યું કે ઓપરેશન પૂર્ણ થયા બાદ વિગતવાર માહિતી અલગથી જાહેર કરવામાં આવશે. ચાર જિલ્લાના ડીઆરજી અને એસટીએફ ઓપરેશનમાં સામેલ છે.
તે જ સમયે, છત્તીસગઢના બીજાપુર જિલ્લામાં પત્રકાર મુકેશ ચંદ્રાકરની હત્યાના કેસમાં શનિવારે ત્રણ લોકોની ધરપકડ કરવામાં આવી હતી. નાયબ મુખ્યમંત્રી વિજય શર્માએ હત્યાની તપાસ માટે વિશેષ તપાસ ટીમની રચના કરવાની જાહેરાત કરી હતી. શર્માએ એવો પણ દાવો કર્યો હતો કે મુખ્ય આરોપી સુરેશ ચંદ્રાકર કોંગ્રેસના નેતા અને કોન્ટ્રાક્ટર છે. જો કે કોંગ્રેસે દાવો કર્યો છે કે સુરેશ ચંદ્રાકર સત્તાધારી ભાજપમાં જોડાયા છે. પોલીસના જણાવ્યા અનુસાર, પત્રકાર મુકેશ ચંદ્રાકર (૩૩) ૦૧ જાન્યુઆરીની રાતથી ગુમ હતો અને શુક્રવારે તેનો મૃતદેહ બીજાપુર શહેરના ચટ્ટનપારા બસ્તીમાં સુરેશ ચંદ્રાકરની માલિકીની જગ્યામાં આવેલી સેપ્ટીક ટાંકીમાંથી મળી આવ્યો હતો.
