અમરેલી જિલ્લામાં ઘણા સમયથી વરસાદ ન પડવાને કારણે ખેડૂતો મુશ્કેલીમાં મુકાયા છે. ખાસ કરીને સાવરકુંડલા તાલુકાના ગ્રામ્ય વિસ્તારોમાં ચોમાસાની સીઝન માટે ઉત્સાહપૂર્વક મગફળી, કપાસ, સોયાબીન અને ડુંગળી જેવા પાકોનું વાવેતર કરનાર ખેડૂતો હાલ ચિંતા અને નિરાશામાં મુકાયા છે. વરસાદ લાંબા સમયથી ખેંચાઈ રહ્યો છે, જેના કારણે પાકોને સમયસર પાણી મળી રહ્યું નથી.
સાવરકુંડલા તાલુકાના ખડસલી ગામના ખેડૂત ચેતનભાઇ માલાણી જણાવે છે કે તેમણે ૩૦ વીઘા જમીનમાં મગફળીનું વાવેતર કર્યું છે, પરંતુ વીજળીની અનિયમિત સપ્લાયને કારણે પાકને યોગ્ય સમયે પિયત આપી શકાતું નથી. વરસાદ શરૂ થયા પછી સારો માહોલ રહ્યો, પરંતુ સૂયા બેસવાના સમયે વરસાદ ખેંચાઈ જતાં પાક પર ખરાબ અસર પડી છે. પાણીનો અભાવ અને અનિયમિત વીજળીના કારણે મગફળી અને કપાસના છોડ સુકાઈ જવાના ભયથી ખેડૂતોમાં ચિંતા વધી રહી છે.પિયાવા ગામના ખેડૂત ચિરાગભાઈ હિરપરા જણાવે છે કે તેમણે ૧૦ વીઘામાં મગફળીનું વાવેતર કર્યું છે. ચોમાસાની શરૂઆત સારી હોવાથી ખેડૂતોમાં આશા જાગી હતી અને મગફળી, સોયાબીન, કપાસ અને ડુંગળીનું મોટા પ્રમાણમાં વાવેતર થયું હતું. પરંતુ છેલ્લા ૩૦ થી ૪૦ દિવસથી વરસાદ ખૂબ ઓછો થયો છે. લાંબા સમયથી વરસાદ ખેંચાઈ જતાં પાક સુકાઈ જવાની સ્થિતિમાં છે અને ખેડૂતો ચિંતિત છે.ચિરાગભાઈ કહે છે કે સાવરકુંડલા તાલુકાના મોટા ભાગના લોકો ખેતી સાથે સંકળાયેલા છે. અહીંનો મોટો વિસ્તાર દરિયાકાંઠા નજીક હોવાથી ખારો ગણાય છે. આ વિસ્તારની સિંચાઈ માટે ‘સૌની યોજના’ અંતર્ગત પાણીની મોટી આશા હતી, પરંતુ આજ સુધી કોઈ ચેક ડેમમાં સૌની યોજનાનું પાણી પહોંચ્યું નથી. જા સમયસર પાણી છોડવામાં આવે તો ખેડૂતોને પાક બચાવવા માટે મોટી રાહત મળશે. ખેડૂતોનું માનવું છે કે હાલ તાત્કાલિક પાણી વ્યવસ્થા શક્ય ન હોય, પરંતુ આવતા વર્ષોને ધ્યાનમાં રાખીને સૌની યોજના દ્વારા સાવરકુંડલા તાલુકાના તમામ ચેક ડેમોમાં પાણી ભરવાની યોજના અમલમાં મૂકવી જાઈએ. આ પગલું લેવાય તો આગળના સમયમાં ખેડૂતો પાકના ઉત્પાદન સાથે હરિયાળી ક્રાંતિ લાવી શકે.હાલની સ્થિતિમાં ખેડૂતોને બે મોટી મુશ્કેલીઓનો સામનો કરવો પડી રહ્યો છેઃ એક, વરસાદનો અભાવ અને બીજું, વીજળીની અનિયમિત સપ્લાય. વરસાદ વિના પાકને પિયત માટે પાણી ઉપલબ્ધ નથી અને વીજળી પણ સમયસર ન મળવાના કારણે મોટર ચલાવીને પિયત આપવું મુશ્કેલ બની રહ્યું છે. મગફળી, સોયાબીન, કપાસ તેમજ ડુંગળી જેવા પાક પાણીના અભાવે સુકાઈ રહ્યા છે. ખેડૂતોના મતે, સરકાર અને સંબંધિત વિભાગો તાત્કાલિક હસ્તક્ષેપ કરે, સૌની યોજનાનું પાણી ઝડપથી છોડે અને વીજળીની સમસ્યા ઉકેલે તો પાકને બચાવી શકાય છે. નહિતર, આ વર્ષે ખેડૂતોને મોટા પ્રમાણમાં આર્થિક નુકસાન વેઠવું પડી શકે છે. હાલ તો વરસાદના વાદળો ક્યારે કૃપા કરશે તેની રાહમાં સાવરકુંડલા તાલુકાના ખેડૂતો આકાશ તરફ આશાભરી નજરે જાઈ રહ્યા છે.
