ઝારખંડ હાઈકોર્ટે કહ્યું છે કે અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમ હેઠળ કોઈ જનજાતિને “આદિવાસી” કહેવાને ગુનો ગણવામાં આવશે નહીં. સુનીલ કુમાર દ્વારા દાખલ કરાયેલી અરજી પર સુનાવણી કરતી વખતે ન્યાયાધીશ અનિલ કુમાર ચૌધરીએ જણાવ્યું હતું કે એસસી એસટી (અત્યાચાર નિવારણ) અધિનિયમ હેઠળ સજાપાત્ર ગુનાનો કેસ બનાવવા માટે, પીડિતા અનુસૂચિત જાતિ એસસી અથવા અનુસૂચિત જનજાતિ એસટીના સભ્ય હોવા જોઈએ. કોર્ટે કહ્યું કે ભારતના બંધારણના અનુસૂચિમાં આદિવાસી શબ્દનો ઉપયોગ થયો નથી અને જ્યાં સુધી પીડિત બંધારણમાં ઉલ્લેખિત અનુસૂચિત જનજાતિની યાદીમાં ન આવે ત્યાં સુધી આરોપી વિરુદ્ધ કાયદા હેઠળ કોઈ કેસ ચલાવી શકાતો નથી.
તમને જણાવી દઈએ કે કોર્ટ લોક સેવક કુમારની અરજી પર સુનાવણી કરી રહી હતી, જેમણે દુમકા પોલીસ સ્ટેશનમાં તેમની વિરુદ્ધ નોંધાયેલી એફઆઇઆરને પડકારી હતી. એફઆઈઆર નોંધાવનાર પીડિતાએ દાવો કર્યો હતો કે તે અનુસૂચિત જનજાતિ (એસટી) ની છે. પીડિતાએ એફઆઇઆરમાં જણાવ્યું હતું કે તે માહિતી અધિકાર કાયદા હેઠળ અરજી સબમિટ કરવા માટે કુમારને તેમની ઓફિસે મળવા ગઈ હતી. કુમારે અરજી સ્વીકારવાનો ઇનકાર કર્યો હતો અને પીડિતાને “પાગલ આદિવાસી” ગણાવ્યો હતો.
મહિલાએ એવો પણ આરોપ લગાવ્યો હતો કે કુમારે તેને તેની ઓફિસમાંથી કાઢી મૂકી હતી અને તેનું અપમાન કર્યું હતું. સુનિલ કુમારના વકીલ ચંદના કુમારીએ કોર્ટ સમક્ષ દલીલ કરી હતી કે તેમણે (કુમારે) મહિલાની ચોક્કસ જાતિ કે જનજાતિનો ઉલ્લેખ કર્યો નથી અને ફક્ત “આદિવાસી” શબ્દનો ઉપયોગ કર્યો છે. કુમારે દલીલ કરી હતી કે આ ગુનો નથી. તેમણે એમ પણ કહ્યું કે એફઆઈઆર એસસી/એસટી એક્ટ હેઠળ નોંધવામાં આવી હતી. ૮ એપ્રિલના રોજ પસાર કરાયેલા પોતાના આદેશમાં કોર્ટે કહ્યું હતું કે જાહેર સેવક કુમાર સામે ફોજદારી કાર્યવાહી ચાલુ રાખવી એ કાયદાની પ્રક્રિયાનો દુરુપયોગ હશે. કોર્ટે એફઆઇઆર અને કેસ સંબંધિત કાર્યવાહી રદ કરી.
