કોંગ્રેસ પાર્ટીના વરિષ્ઠ નેતા અને ભૂતપૂર્વ કેન્દ્રીય મંત્રી સુરેશ કલમાડીનું સોમવારે નિધન થયું. પરિવારના સૂત્રોએ સોમવારે આ સમાચારની પુષ્ટિ કરી. અહેવાલો અનુસાર, સુરેશ કલમાડી ૮૧ વર્ષના હતા અને લાંબા સમયથી બીમાર હતા. લાંબી બીમારી બાદ મંગળવારે સવારે ૩:૩૦ વાગ્યે પુણેમાં તેમનું અવસાન થયું.
અહેવાલો અનુસાર, સુરેશ કલમાડીના પાર્થિવ શરીરને આજે બપોરે ૨ વાગ્યા સુધી એરંડવને સ્થિત કલમાડી હાઉસ ખાતે જાહેર દર્શન માટે રાખવામાં આવ્યો હતો આજે બપોરે ૩:૩૦ વાગ્યે પુણેના નવી પેઠ સ્થિત વૈકુંઠ સ્મશાનગૃહમાં તેમના અંતિમ સંસ્કાર કરવામાં આવ્યા હતાં. સુરેશ કલમાડીના પરિવારમાં તેમની પત્ની, એક પરિણીત પુત્ર, એક પુત્રવધૂ, બે પરિણીત પુત્રીઓ, એક જમાઈ અને પૌત્ર-પૌત્રીઓનો સમાવેશ થાય છે.
સુરેશ કલમાડી મહારાષ્ટ્રના પુણેના ભૂતપૂર્વ સંસદ સભ્ય હતા. તેમણે કેન્દ્ર સરકારમાં રેલ્વે રાજ્યમંત્રી અને ભારતીય ઓલિમ્પિક સંઘના પ્રમુખ તરીકે પણ સેવા આપી હતી. સુરેશ કલમાડી એક એવું નામ હતું જેણે ભારતીય રમતગમત જગતથી લઈને દિલ્હીની સત્તા સુધી પોતાની એક અનોખી ઓળખ બનાવી. આજે, તે યાત્રાનો અંત આવ્યો છે.
સુરેશ કલમાડી માત્ર રાજકારણી જ નહોતા, પરંતુ તેમને “પુણેના કિંગમેકર” માનવામાં આવતા હતા. ભારતીય વાયુસેનામાં પાઇલટ તરીકે કારકિર્દી શરૂ કરનાર કલમાડીએ પાછળથી રાજકારણમાં પ્રવેશ કર્યો. તેમણે ઘણી વખત સંસદ સભ્ય તરીકે સેવા આપી અને કેન્દ્ર સરકારમાં મંત્રી તરીકે પણ સેવા આપી. પુણેના માળખાગત સુવિધાઓ અને વિકાસમાં તેમનું યોગદાન હજુ પણ યાદ કરવામાં આવે છે.
સુરેશ કલમાડીનો રમતગમત પ્રત્યેનો જુસ્સો જાણીતો હતો. ભારતીય ઓલિમ્પિક એસોસિએશનના પ્રમુખ તરીકે, તેમણે લાંબા સમય સુધી ભારતીય રમતગમતનું નેતૃત્વ કર્યું. ૨૦૧૦ ની દિલ્હી કોમનવેલ્થ ગેમ્સ તેમની કારકિર્દીમાં એક મોટો સીમાચિહ્નરૂપ સાબિત થઈ. જાકે આ રમતોને લગતા વિવાદોએ તેમની રાજકીય કારકિર્દીને ઢાંકી દીધી હતી, પરંતુ તેમને રમતગમતને મોટા પાયે લાવવાનો શ્રેય પણ આપવામાં આવે છે. તેમના મૃત્યુના સમાચારથી રાજકીય જગતમાં શોકની લહેર ફેલાઈ ગઈ. કોંગ્રેસ પાર્ટીના નેતાઓ સહિત વિવિધ પક્ષોના નેતાઓએ શ્રદ્ધાંજલિ આપી. પુણેએ એક અગ્રણી નેતા ગુમાવ્યો છે.”
