હાસ્ય કલાકાર કપિલ શર્મા છેલ્લા કેટલાક સમયથી તેમના નવા કાફે વિશે સમાચારમાં છે. લગભગ એક અઠવાડિયા પહેલા, તેમણે કેનેડામાં પોતાનું કાફે કેપ્સ કાફે ખોલ્યું હતું. પરંતુ, ખુલ્યાના એક અઠવાડિયામાં, તે વિવાદોથી ઘેરાયેલું છે. ખરેખર, ૧૦ જુલાઈના રોજ, કેપ્સ કાફેમાં અંધાધૂંધ ગોળીબાર થયો હતો, જોકે કોઈના જીવને કોઈ જોખમ નહોતું, પરંતુ કાફેને નુકસાન થયું છે. કાફે પર હુમલા બાદ કપિલની અંગત સુરક્ષા ઘણી વધારી દેવામાં આવી છે.
કપિલ શર્માના કાફેનો એક વીડિયો સોશિયલ મીડિયા પર વાયરલ થઈ રહ્યો છે, જેમાં બિલ્ડીંગ પર ગોળીબાર થઈ રહ્યો છે. ખાલિસ્તાની આતંકવાદી હરજીત સિંહ લડ્ડીએ આ હુમલાની જવાબદારી લીધી છે. જોકે, કેનેડામાં થયેલા હુમલા બાદ કપિલના મુંબઈ સ્થીત ઘર, ઓફિસ અને કપિલના શોના ફિલ્મસિટ સ્ટુડિયોની સુરક્ષા વધારી દેવામાં આવી છે. મુંબઈ પોલીસ પણ કપિલના અંધેરી લોખંડવાલા સ્થીત ફ્લેટનું નિરીક્ષણ કરવા પહોંચી ગઈ છે.
જોકે કપિલ શર્માના અંગત બાઉન્સર્સની ટીમ હંમેશા તેની સાથે હાજર રહે છે, પરંતુ કાફેમાં ગોળીબાર બાદ તેના ઘરની સુરક્ષા વધુ વધારી દેવામાં આવી છે. આ સાથે, ગોળીબારની ઘટના પછી, ભારતમાં પોલીસ અને એજન્સીઓ સતર્ક થઈ ગઈ છે. હુમલાની જવાબદારી લેનાર હરજીત સિંહ લાડ્ડી, મોસ્ટ વોન્ટેડ આતંકવાદી છે, જે બબ્બર ખાલસા ઇન્ટરનેશનલ માટે કામ કરે છે. ગોળીબારની ઘટના પછી, તેણે કપિલ શર્માને ભવિષ્યમાં તેનાથી પણ ખરાબ પરિણામોની ધમકી પણ આપી છે.
કપિલના કાફે પર આ રીતે હુમલો કરવાનું કારણ જણાવતા હરજીત સિંહ લડ્ડીએ કહ્યું કે કપિલે થોડા સમય પહેલા નિહંગ શીખોના પહેરવેશની મજાક ઉડાવી હતી. આ વાતથી હરજીત ગુસ્સે થયો હતો, ત્યારબાદ તેણે કપિલના મેનેજર સાથે વાત કરવાનો પણ પ્રયાસ કર્યો હતો. પરંતુ, જ્યારે મેનેજર તરફથી કોઈ જવાબ ન મળ્યો, ત્યારે તેણે આવું પગલું ભર્યું. ગોળીબાર પછી હરજીતએ કહ્યું કે જો કપિલ તેની મજાક માટે માફી નહીં માંગે તો તેના વધુ ખરાબ પરિણામો આવશે.
