આઇપીએલ ૨૦૨૬ ની સૌથી મહત્વપૂર્ણ મેચોમાંની એકમાં, પંજાબ કિંગ્સના કેપ્ટન શ્રેયસ ઐયરે એક ધમાકેદાર ઇનિંગ રમી જેણે ટીમને માત્ર જીત અપાવી નહીં પરંતુ ટુર્નામેન્ટના ઇતિહાસમાં પોતાનું નામ સુવર્ણ અક્ષરોમાં કોતર્યું. લખનૌ સુપર જાયન્ટ્સ સામે મુશ્કેલ લક્ષ્યનો પીછો કરતા શ્રેયસે એક એવી ઇનિંગ રમી જે આઇપીએલ ચાહકો લાંબા સમય સુધી યાદ રાખશે. નોંધનીય છે કે, તેની ઇનિંગે એક એવો રેકોર્ડ પણ બનાવ્યો જે કોઈ કેપ્ટને ક્યારેય હાંસલ કર્યો ન હતો.
લખનૌના એકાના સ્ટેડિયમમાં રમાયેલી મેચમાં, પંજાબ કિંગ્સને જીતવા માટે એક વિશાળ લક્ષ્ય આપવામાં આવ્યું હતું. ટીમની શરૂઆત નબળી રહી હતી, તેણે ફક્ત ૨૨ રનમાં બે વિકેટ ગુમાવી દીધી હતી. આવી મુશ્કેલ પરિÂસ્થતિમાં, કેપ્ટન શ્રેયસ ઐયરે જવાબદારી સંભાળી અને આક્રમક બેટિંગ કરતા માત્ર ૫૧ બોલમાં ૧૦૧ રન બનાવ્યા. તેણે આ ઇનિંગમાં ૧૧ ચોગ્ગા અને પાંચ છગ્ગા ફટકાર્યા.
આ સદી સાથે, શ્રેયસ ઐયરે આઇપીએલ ઇતિહાસમાં ચોથા કે તેથી નીચેના નંબર પર બેટિંગ કરતી વખતે સદી ફટકારનાર પ્રથમ કેપ્ટન બન્યો. તેની પહેલા, કેપ્ટનોએ આઇપીએલમાં ૧૬ વખત સદી ફટકારી હતી, પરંતુ તે બધાએ ટોચના ત્રણમાં બેટિંગ કરતી વખતે આ સિદ્ધિ હાંસલ કરી હતી. વધુમાં, શ્રેયસ આઇપીએલ રન ચેઝમાં સદી ફટકારનાર ચોથો કેપ્ટન પણ બન્યો. તેમના પહેલા, આ સિદ્ધિ ફક્ત સંજુ સેમસન, વિરાટ કોહલી અને વીરેન્દ્ર સેહવાગ પાસે હતી. જાકે, તે પંજાબ કિંગ્સ માટે લક્ષ્યનો પીછો કરતી વખતે સદી ફટકારનાર પ્રથમ કેપ્ટન બન્યો. અગાઉ, ફક્ત કેએલ રાહુલ અને એડમ ગિલક્રિસ્ટે પીબીકેએસના કેપ્ટન તરીકે સદી ફટકારી હતી, પરંતુ બંનેએ પ્રથમ ઇનિંગમાં આ સિદ્ધિ મેળવી હતી.
શ્રેયસ ઐયરની કેપ્ટનશીપ હેઠળ, પંજાબ કિંગ્સ સતત મોટા લક્ષ્યોનો પીછો કરવામાં સફળ રહી છે. તેના આગમનથી, ટીમે સાત વખત ૧૯૦ થી વધુ રનનો લક્ષ્યાંક હાંસલ કર્યો છે, અને નોંધપાત્ર રીતે, શ્રેયસે આ તમામ રન ચેઝમાં અડધી સદી ફટકારી છે. પરંતુ લખનૌ સામેની આ ઇનિંગ કદાચ સૌથી ખાસ હતી, કારણ કે ટીમ દબાણ હેઠળ હતી અને તેમની પ્લેઓફની આશાઓ દાવ પર હતી.
શ્રેયસ ઐયરે મેચ પછી ખુશી વ્યક્ત કરતા કહ્યું કે સદી યોગ્ય સમયે આવી. તેણે કહ્યું કે તે ખૂબ જ ખુશ છે. આ તેની પહેલી આઈપીએલ સદી હતી અને તે સમયે આવી જ્યારે ટીમને તેની સૌથી વધુ જરૂર હતી. સતત છ હાર પછી જીત મેળવવી એક અદ્ભુત લાગણી હતી. મેચ પૂરી કરવી અને સદી ફટકારવી એ કોઈપણ બેટ્સમેન માટે સ્વપ્ન સાકાર થવું હોય છે. તેમણે ઉમેર્યું કે તેમનું ધ્યાન હવે મુંબઈ ઈન્ડિયન્સ સામેની આગામી મેચ પર રહેશે, કારણ કે પંજાબ કિંગ્સની પ્લેઓફની આશાઓ પણ અન્ય પરિણામો પર આધારિત છે.
