આસામના સોનિતપુર જિલ્લામાં રવિવારે મોડી રાત્રે એક એમ્બ્યુલન્સ અને ટ્રક સામસામે ટકરાયા હતા. આ અકસ્માતમાં સાત લોકોના મોત થયા છે. અહેવાલો અનુસાર, જિલ્લામાં નેશનલ હાઇવે ૧૫ પર ટ્યૂલિપ ટી ગાર્ડનથી દર્દીને લઈ જતી એમ્બ્યુલન્સ રવિવારે મોડી રાત્રે એક ટ્રક સાથે અથડાઈ હતી. દર્દીના પરિવારના સભ્યો પણ એમ્બ્યુલન્સમાં હાજર હતા. આ અકસ્માતમાં અત્યાર સુધીમાં સાત લોકોના મોત થયા છે. બચાવ ટીમોએ સ્થળ પર ટ્રાફિક પુનઃસ્થાપિત કર્યો છે.
સોનિતપુરના એસએસપી બરુણ પુરકાયસ્થે જણાવ્યું હતું કે એમ્બ્યુલન્સ એક દર્દી અને તેના પરિવારના સભ્યોને તેજપુર મેડિકલ કોલેજ અને હોસ્પિટલ લઈ જઈ રહી હતી ત્યારે ઢેકિયાજુલી પોલીસ સ્ટેશનના અધિકારક્ષેત્ર હેઠળના રાષ્ટ્રીય ધોરીમાર્ગ ૧૫ પર અકસ્માત થયો. એસએસપીએ જણાવ્યું હતું કે, “છ લોકોના ઘટનાસ્થળે જ મોત થયા હતા, જ્યારે બે અન્ય ગંભીર રીતે ઘાયલ થયા હતા. ઘાયલોને તેજપુર મેડિકલ કોલેજ અને હોસ્પિટલમાં દાખલ કરવામાં આવ્યા હતા, જ્યાં એક વ્યક્તિનું મોત થયું હતું.” એસએસપીએ જણાવ્યું હતું કે પોલીસ અને કટોકટી સેવાના કર્મચારીઓ તાત્કાલિક અકસ્માત સ્થળે પહોંચ્યા હતા અને બચાવ કામગીરી શરૂ કરી હતી. તેમણે ઉમેર્યું હતું કે અકસ્માતને કારણે અવરોધિત હાઇવે પર ટ્રાફિક પુનઃસ્થાપિત કરવામાં આવ્યો છે.
આવી જ એક ઘટનામાં, મધ્યપ્રદેશના મંડલા જિલ્લામાં એક પુલ પરથી બાઇક પડી જતાં ચાર યુવાનોના મોત થયા હતા. શનિવારે રાત્રે લગભગ ૮ વાગ્યે બિજદંડી પોલીસ સ્ટેશન વિસ્તારમાં ભૈંસવાહી ગામ પાસે આ અકસ્માત થયો હતો. અહેવાલો અનુસાર, ચાર યુવાનો પૌરી ગામથી ભૈસાવાહી ગામ તરફ મોટરસાઇકલ પર જઈ રહ્યા હતા. પુલ પાર કરતી વખતે મોટરસાઇકલ ખાડામાંથી પડી ગઈ. અકસ્માતમાં ચારેય યુવાનો ગંભીર રીતે ઘાયલ થયા હતા અને બાદમાં તેમનું મૃત્યુ થયું હતું.
