કેરળના મુખ્યમંત્રી પિનરાયી વિજયને દેશમાં વધતા ઉર્જા સંકટ માટે કેન્દ્ર સરકારની નીતિઓને દોષી ઠેરવી છે. વિજયને આરોપ લગાવ્યો કે કોંગ્રેસ અને ભાજપની આગેવાની હેઠળની સરકારોએ અમેરિકાના પ્રભાવ હેઠળ એવા નિર્ણયો લીધા જેના કારણે દેશની ઉર્જા સુરક્ષા જાખમમાં મુકાઈ ગઈ.
સીએમ વિજયને કહ્યું કે ૨૦૦૬ માં ભારત પ્રસ્તાવિત ભારત-ઈરાન ગેસ પાઇપલાઇન પ્રોજેક્ટમાંથી ખસી ગયું હતું. આ એક ઐતિહાસિક ભૂલ હતી. તેમણે સીધો આરોપ લગાવ્યો કે મનમોહન સિંહના નેતૃત્વ હેઠળની તત્કાલીન યુપીએ સરકારે યુનાઇટેડ સ્ટેટ્સના દબાણ હેઠળ આ પગલું ભર્યું હતું. જા આ પ્રોજેક્ટ સમયસર પૂર્ણ થયો હોત, તો દેશની ઉર્જા જરૂરિયાતો આજે સસ્તી અને સુલભ હોત.
વિજયને તત્કાલીન કેન્દ્રીય પેટ્રોલિયમ મંત્રી મણિશંકર ઐયરને હટાવવાના મુદ્દાને પણ ફરીથી ઉજાગર કર્યો. તેમણે દાવો કર્યો કે ઐયરને ફક્ત એટલા માટે હટાવવામાં આવ્યા હતા કારણ કે તેઓ પાઇપલાઇન પ્રોજેક્ટના મજબૂત સમર્થક હતા. મુરલી દેવરાને તેમની જગ્યાએ લેવાનો સંકેત એ હતો કે સરકારની પ્રાથમિકતાઓ “રાષ્ટ્રીય હિતો” થી “કોર્પોરેટ હિતો” તરફ બદલાઈ ગઈ છે.
મુખ્યમંત્રીએ વર્તમાન મોદી સરકારની પણ ટીકા કરી. તેમણે કહ્યું કે આજે પણ કેટલીક ખાનગી ઉર્જા કંપનીઓને ફાયદો પહોંચાડવા માટે નીતિઓ ઘડવામાં આવી રહી છે. તેમણે રશિયા પાસેથી ક્રૂડ ઓઇલ ખરીદવા અંગે કેન્દ્ર સરકારના વલણને અનિર્ણાયક ગણાવીને તેની પણ ટીકા કરી. તેમણે કહ્યું કે ભારત બાહ્ય દબાણ સામે ઝૂકી રહ્યું છે.
વિજયનના મતે, આંતરરાષ્ટ્રીય બજાર પર વધુ પડતી નિર્ભરતાને કારણે, સામાન્ય માણસ અને ઉદ્યોગ વિનાશના આરે છે. તેમણે કહ્યું કે કેન્દ્ર સરકારે ન તો પૂરતો વ્યૂહાત્મક ભંડાર બનાવ્યો છે અને ન તો ભવિષ્યના પડકારોને ધ્યાનમાં રાખીને સ્થાનિક ઉત્પાદન વધારવા માટે કોઈ ગંભીર પગલાં લીધા છે. હવે સરકારે સતર્ક રહેવાની જરૂર છે.
