આઇઆઇએમ કલકત્તામાં વિદ્યાર્થી પર કથિત બળાત્કારના કેસમાં એક નવો વળાંક આવ્યો છે. આ ઘટના અંગે, વિદ્યાર્થીના પિતાએ શનિવારે નિવેદન આપ્યું હતું કે તેમની પુત્રી સાથે કોઈપણ પ્રકારનો બળાત્કાર થયો નથી. તેમનું કહેવું છે કે તે એક અકસ્માત હતો અને છોકરી આરોપી વિદ્યાર્થીને ઓળખતી પણ નથી. તે જ સમયે, પોલીસે આરોપી વિદ્યાર્થીની ધરપકડ કરી છે અને કોર્ટે તેને ૧૯ જુલાઈ સુધી પોલીસ કસ્ટડીમાં મોકલી દીધો છે.
છોકરીના પિતાએ મીડિયાને જણાવ્યું હતું કે શુક્રવારે રાત્રે ૯.૪૦ વાગ્યે તેમને તેમની પુત્રીનો ફોન આવ્યો હતો. પુત્રીએ જણાવ્યું હતું કે તે વાહનમાંથી પડી ગઈ હતી, જેના કારણે તે ઘાયલ થઈ ગઈ હતી અને બેહોશ થઈ ગઈ હતી. બાદમાં તેમને માહિતી મળી કે પુત્રીને એસએસકેએમ હોસ્પિટલમાં દાખલ કરવામાં આવી છે. તેમણે કહ્યું કે પોલીસ જે દાવો કરી રહી છે તેવું કંઈ થયું નથી.
જાકે, પોલીસે કહ્યું છે કે છોકરીએ એફઆઈઆરમાં આરોપ લગાવ્યો છે કે તેને કાઉન્સેલિંગના નામે હોસ્ટેલમાં બોલાવવામાં આવી હતી. ત્યાં તેને નશીલા પીણું પીવડાવવામાં આવ્યું હતું, જેના પછી તે બેહોશ થઈ ગઈ હતી. જ્યારે તેણી ભાનમાં આવી ત્યારે તેને ખ્યાલ આવ્યો કે તેની સાથે બળાત્કાર થયો છે. આ નિવેદનના આધારે પોલીસે શનિવારે આરોપી વિદ્યાર્થીની ધરપકડ કરી. આરોપી વિદ્યાર્થીને કોલકાતાની અલીપોર કોર્ટમાં રજૂ કરવામાં આવ્યો. બંને પક્ષોની દલીલો સાંભળ્યા પછી, એડિશનલ ચીફ જ્યુડિશિયલ મેજિસ્ટ્રેટે આરોપીને ૧૯ જુલાઈ સુધી પોલીસ કસ્ટડીમાં મોકલવાનો આદેશ આપ્યો. આરોપી વિદ્યાર્થીના વકીલે કોર્ટમાં દાવો કર્યો હતો કે આઇઆઇએમ કલકત્તા એક સુરક્ષિત અને મર્યાદિત પ્રવેશ કેમ્પસ છે, તેથી આ આરોપની સત્યતા પર પ્રશ્ન ઉઠાવવામાં આવે છે.
વિદ્યાર્થીના પિતાના મતે, તેમની પુત્રી આરોપી વિદ્યાર્થીને ઓળખતી પણ નહોતી. તેમનું કહેવું છે કે કોઈ પણ પ્રકારની શારીરિક કે માનસિક હેરાનગતિ થઈ ન હતી, પરંતુ આ ઘટના માત્ર એક અકસ્માત હતી. આ નિવેદન પોલીસ તપાસના દાવાથી તદ્દન વિરુદ્ધ છે, જે હવે કેસની દિશા બદલી શકે છે.
હાલમાં પોલીસ આ મામલાની ઊંડાણપૂર્વક તપાસ કરી રહી છે. મેડિકલ રિપોર્ટ, સીસીટીવી ફૂટેજ અને હોસ્ટેલમાં હાજર વિદ્યાર્થીઓની પૂછપરછ ચાલુ છે. પોલીસનું કહેવું છે કે તેઓ તમામ પાસાઓને ધ્યાનમાં રાખીને તપાસ કરી રહ્યા છે જેથી સત્ય બહાર આવી શકે. હવે જાવાનું એ રહે છે કે પિતાના નિવેદન બાદ તપાસ કઈ દિશામાં જાય છે. આ કેસમાં ૯ સભ્યોની એસઆઇટી ટીમ બનાવવામાં આવી છે. જે આ મામલાની સંપૂર્ણ તપાસ કરશે. આ ટીમનું નેતૃત્વ દક્ષિણ વિભાગના આસિસ્ટન્ટ કમિશનર કરશે. જાકે, પિતાએ પોતાના આરોપો પાછા ખેંચી લીધા બાદ કેસમાં નવો વળાંક આવ્યો છે.
