અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર પોતાની સલામતી અંગે ગંભીર ભય વ્યક્ત કર્યો છે. તેમના માર-એ-લાગો રિસોર્ટમાં તાજેતરમાં થયેલા સુરક્ષા ભંગ બાદ, ટ્રમ્પે કહ્યું, “મને ખબર નથી કે મારી પાસે કેટલો સમય બાકી છે, કારણ કે ઘણા લોકો મને નિશાન બનાવી રહ્યા છે.” તેમણે એક જાહેર કાર્યક્રમમાં આ ટિપ્પણી કરી. ટ્રમ્પે કહ્યું કે તેઓ હંમેશા તેમના સમર્થકોને યાદ રાખશે કારણ કે તેમને ખબર નથી કે તેમનું જીવન કેટલું લાંબું ચાલશે. ઘણા લોકો બંદૂકો સાથે તેના જીવ લેવા પાછળ પડી રહ્યા છે, અને કોઈને ખબર નથી કે તેઓ ક્યારે સફળ થશે.
ટ્રમ્પનું આ નિવેદન ફ્લોરિડાના માર-એ-લાગોમાં પ્રવેશવાનો પ્રયાસ કરતી વખતે ગુપ્ત સેવા એજન્ટો દ્વારા એક વ્યકિતની ગોળી મારીને હત્યા કરવામાં આવ્યા બાદ આવ્યું છે. ૨૧ વર્ષીય ઓસ્ટીન ટકર માર્ટિન તરીકે ઓળખાતો આ વ્યકિત ગેસ કેન અને શોટગન સાથે સુરક્ષિત વિસ્તારમાં પ્રવેશ્યો હતો. જ્યારે એજન્ટોએ તેને રોકવાનું કહ્યું, ત્યારે તેણે પોતાનું હથિયાર ઉંચુ કર્યું, જેના કારણે સુરક્ષા દળોએ ગોળીબાર કરીને તેને ઘાયલ કર્યો. તપાસકર્તાઓને હજુ સુધી આ ઘટનાનો સ્પષ્ટ હેતુ મળ્યો નથી.
માર્ટિનના પરિવારે તેના ગુમ થવાની જાણ કરી હતી, અને તેના પિતરાઇ ભાઇ, બ્રેડન ફિલ્ડ્સે કહ્યું હતું કે તેને ક્્યારેય રાજકારણમાં રસ નહોતો, તે બંદૂકોથી ડરતો હતો, અને તેનો આખો પરિવાર ટ્રમ્પ સમર્થક હતો. તે કીડીને પણ નુકસાન પહોંચાડતો ન હતો. આ ઘટના સમયે ટ્રમ્પ વ્હાઇટ હાઉસમાં હતા, પરંતુ આ ઘટનાએ તેમની સુરક્ષા ચિંતાઓમાં વધારો કર્યો છે.
૨૦૨૪ ના ચૂંટણી પ્રચાર દરમિયાન ટ્રમ્પ આવા જ હત્યાના પ્રયાસોમાંથી બચી ગયા છે. પહેલો બનાવ જુલાઈ ૨૦૨૪ માં પેન્સિલવેનિયાના બટલરમાં એક રેલીમાં બન્યો હતો, જ્યાં થોમસ ક્રૂક્સે તેમના પર ગોળીબાર કર્યો હતો, જેનાથી ટ્રમ્પના કાનમાં ઈજા થઈ હતી. બીજા બનાવ સપ્ટેમ્બર ૨૦૨૪ માં ફ્લોરિડાના ટ્રમ્પ ઇન્ટરનેશનલ ગોલ્ફ ક્લબમાં બન્યો હતો, જ્યાં રાયન વેસ્લી રાઉથે ઝાડીઓમાંથી રાઇફલથી ગોળીબાર કર્યો હતો. રૂથને બાદમાં દોષિત ઠેરવવામાં આવ્યા હતા અને ફેબ્રુઆરી ૨૦૨૬ માં તેમને આજીવન કેદની સજા ફટકારવામાં આવી હતી.
આ ઘટનાઓ પછી ટ્રમ્પે વારંવાર કહ્યું છે કે રાજકીય હિંસા અમેરિકા માટે ખતરો છે. તાજેતરની માર-એ-લાગો ઘટના પછી, વ્હાઇટ હાઉસના પ્રેસ સેક્રેટરી કેરોલિન લેવિટે ઇન્સ્ટાગ્રામ પર પોસ્ટ કર્યું હતું કે ગુપ્ત સેવાએ તાત્કાલિક બંદૂક અને ગેસ કેન સાથે આવેલા પાગલને તટસ્થ કરી દીધો હતો. ટ્રમ્પ વિશ્વના સૌથી સુરક્ષિત રાજ્યના વડા છે, અને જા તેમને ખતરો લાગે છે, તો તે ચોક્કસપણે ચિંતાનો વિષય છે. હાલમાં, ટ્રમ્પ વહીવટીતંત્રે સુરક્ષા વ્યવસ્થા વધુ કડક કરવાનો સંકેત આપ્યો છે.
