ભારતના ચૂંટણી પંચ દ્વારા ચાલી રહેલા ‘SIR’ (Special Intensive Revision) એટલે કે મતદારયાદી સુધારણા કાર્યક્રમ અંતર્ગત અમરેલી જિલ્લામાં ૨૩ નવેમ્બર, ૨૦૨૫ (રવિવાર) ના રોજ વિશેષ બૂથ ડ્રાઈવનું આયોજન કરવામાં આવ્યું હતું. આ કાર્યક્રમને વેગવંતો બનાવવા માટે અમરેલી જિલ્લા ભાજપના આગેવાનો સક્રિયપણે જોડાયા હતા.
આ અભિયાનમાં મતદાતાઓને સચોટ અને ઝડપી સેવા મળી રહે તે હેતુથી જિલ્લા ભાજપ દ્વારા ચૂંટાયેલા પદાધિકારીઓ અને સંગઠનના આગેવાનોને બૂથ પર જઈને મદદરૂપ થવા આહ્વાન કરવામાં આવ્યું હતું. આ દરમિયાન જિલ્લા ભાજપ પ્રમુખ અતુલભાઈ કાનાણીએ જણાવ્યું હતું કે, SIR કાર્યક્રમ એ આપણો પોતાનો છે તેમ માનીને સૌએ સહકાર આપવો જોઈએ.”
મહાનુભાવોની બૂથ મુલાકાત દરમિયાન ઊર્જા મંત્રી કૌશિકભાઈ વેકરીયાએ અમરેલી તાલુકાના મોટા માચિયાળાના બૂથ નંબર ૧૨૬, ૧૨૭ અને નાના માચિયાળાના બૂથ નંબર ૧૩૦, ૧૩૧ સહિત વિવિધ બૂથની મુલાકાત લીધી હતી. જ્યારે સાંસદ ભરતભાઈ સુતરીયાએ લોકસભા વિસ્તારના વિવિધ ગામોના બૂથ પર જઈને મુલાકાત લીધી હતી. જિલ્લા ભાજપ પ્રમુખ અતુલભાઈ કાનાણીએ ધારી તાલુકાના પ્રેમપરા, હરીપરા અને નવી વસાહત સહિતના બૂથની મુલાકાત લીધી હતી. આ ઉપરાંત રાજુલાના ધારાસભ્ય હીરાભાઈ સોલંકીએ શિયાળબેટ, ચાંચ, વિક્ટરથી છતડિયા સુધીના બૂથની તેમજ લાઠીના ધારાસભ્ય જનકભાઈ તળાવીયાએ કાંચરડી, નારણગઢ, દામનગરથી લુણકી સુધીના બૂથ પર જઈ BLO અને મતદારો સાથે ચર્ચા કરી હતી. ધારીના ધારાસભ્ય જે.વી. કાકડીયાએ ધારી, ડેરી પીપરીયાથી લઈને રાયડી સુધીના બૂથમાં કામગીરીનું નિરીક્ષણ કર્યું હતું, જ્યારે સાવરકુંડલાના ધારાસભ્ય મહેશભાઈ કસવાલા સાવરકુંડલા શહેરના વિવિધ બૂથ પર જઈ કામગીરીમાં મદદરૂપ થયા હતા. રવિવારની આ ડ્રાઈવમાં તમામ આગેવાનોએ પોતપોતાના નિર્ધારિત બૂથ પર હાજર રહીને BLO ને મદદ કરી હતી અને વધુમાં વધુ ફોર્મ ભરાય તે માટે પ્રયાસ કર્યા હતા.
