રાજ્ય સરકારે અમરેલીમાં પશ્ચિમ ગુજરાત વીજ કંપની લિમિટેડ (PGVCL) હસ્તકની નવી ગ્રામીણ-૨ પેટા વિભાગ કચેરીને મંજૂરી આપી છે, જે સ્થાનિકો માટે વહીવટી સુગમતા લાવશે. ઊર્જા અને પેટ્રોકેમિકલ્સ રાજ્ય મંત્રી કૌશિકભાઈ વેકરીયાએ ખાસ કિસ્સામાં કુલ ૪૪ જગ્યાઓ સાથે આ કચેરીની રચનાને મંજૂરી આપી છે. લાંબા સમયથી અમરેલી ગ્રામીણ પેટા વિભાગ કચેરીનું વિભાજન કરીને નવી કચેરી બનાવવાની માંગણી હતી. પ્રજાની રજૂઆતને ધ્યાનમાં રાખીને, મંત્રી વેકરીયાએ સત્તા સંભાળ્યાના માત્ર દોઢ માસમાં જ ઊર્જા વિભાગને આ કચેરીની રચનાને મંજૂરી આપવા નિર્દેશ આપ્યા હતા. તેના અનુસંધાને, ઊર્જા વિભાગ દ્વારા ૧૦મી ડિસેમ્બરના રોજ નોટિફિકેશન બહાર પાડીને કચેરીના વિભાજનને મંજૂરી આપવામાં આવી છે. મંજૂર કરાયેલી ૪૪ જગ્યાઓમાંથી, ૩૫ નવી જગ્યાઓ ઊભી કરાશે અને ૯ જગ્યાઓ હાલના અમરેલી ગ્રામીણ પેટા વિભાગમાંથી સ્થાનાંતરિત કરવામાં આવશે. આ નિર્ણયથી વીજવહીવટ વધુ સુચારુ બનશે.
