શહેરના મકરબા વિસ્તારમાં આવેલી ફેઈથ હોસ્પિટલમાં ૩૧ વર્ષીય દર્દીના મોતની ઘટનાએ ખળભળાટ મચાવ્યો છે. દર્દીના મોત બાદ પરિવારજનોએ હોસ્પિટલના ડોક્ટરો પર બેદરકારીનો આરોપ લગાવી હોબાળો મચાવ્યો હતો. આ ઘટનાએ હોસ્પિટલની કામગીરી અને સારવારની ગુણવત્તા અંગે ગંભીર સવાલો ઉભા કર્યા છે.
દાણીલીમડા વિસ્તારના રહેવાસી ૩૧ વર્ષીય દર્દીને ફેઈથ હોસ્પિટલમાં દાખલ કરવામાં આવ્યા હતા. પ્રાથમિક તપાસ બાદ ડોક્ટરોએ દર્દીના રિપોર્ટ તૈયાર કર્યા હતા, જેમાં તેમના મગજમાં ગાંઠ હોવાનું નિદાન થયું હતું. આ ગંભીર સ્થિતિને ધ્યાનમાં રાખીને ડોક્ટરોએ દર્દીને એન્જીયોગ્રાફી માટે મોકલ્યા હતા. જાકે, પરિવારજનો મુજબ, ડોક્ટરોની બેદરકારીના કારણે દર્દીના મગજમાં ગાંઠ ફૂટી ગઈ, જેના પરિણામે તેમની હાલત ગંભીર બની હતી.
ગંભીર સ્થિતિમાં દર્દીને તાત્કાલિક સારવાર માટે બીજી હોસ્પિટલમાં ખસેડવામાં આવ્યા હતા, પરંતુ ત્યાં પણ તેમનો જીવ બચાવી શકાયો નહીં. દર્દીના મોતના સમાચાર મળતાં જ પરિવારજનો અને સ્થાનિક લોકોએ ફેઈથ હોસ્પિટલ ખાતે ભેગા થઈ ડોક્ટરો અને હોસ્પિટલ વહીવટીતંત્ર સામે રોષ ઠાલવ્યો હતો. તેમણે હોસ્પિટલની સારવાર પદ્ધતિ અને ડોક્ટરોની બેદરકારીને દર્દીના મોત માટે જવાબદાર ગણાવી હતી.
પરિવારજનોએ આરોપ લગાવ્યો કે હોસ્પિટલના ડોક્ટરોએ દર્દીની ગંભીર સ્થિતિને યોગ્ય રીતે હેન્ડલ કરી ન હતી. તેમનું કહેવું છે કે ગાંઠનું નિદાન થયા બાદ પણ ડોક્ટરોએ સમયસર અને યોગ્ય સારવાર ન આપી, જેના કારણે ગાંઠ ફૂટી અને દર્દીની હાલત વણસી ગઈ. પરિવારે માંગ કરી છે કે આ ઘટનાની નિષ્પક્ષ તપાસ કરવામાં આવે અને જવાબદાર ડોક્ટરો સામે કડક કાર્યવાહી કરવામાં આવે.
