માનસિક સ્વાસ્થ્ય અને તેની સંબંધિત સમસ્યાઓ અંગે ભારતીયોની વિચારસરણીમાં નોંધપાત્ર સુધારો થયો છે. એક સર્વે અનુસાર, મોટાભાગના લોકો હવે માનસિક સ્વાસ્થ્ય સમસ્યાઓની સારવાર માટે આગળ આવતા ખચકાતા નથી.
છેલ્લાં કેટલાંક વર્ષોમાં ભારતીયોમાં માનસિક સ્વાસ્થ્ય વિશેની ધારણામાં નોંધપાત્ર વધારો થયો છે. એક નવા સર્વેમાં આ દાવો કરવામાં આવ્યો છે. આ મુજબ, તેમાં ભાગ લેનારા ૯૨ ટકા લોકો માનસિક સ્વાસ્થ્ય સંબંધિત સારવાર માટે સંમત થયા છે. વર્ષ ૨૦૧૮માં આ આંકડો માત્ર ૫૪ ટકા હતો. આ સર્વે એલએલએલ ફાઉન્ડેશન દ્વારા કરવામાં આવ્યો છે. આ એક ચેરિટેબલ ટ્રસ્ટ છે જેની સ્થાપના બોલીવુડની પ્રખ્યાત અભિનેત્રી દીપિકા પાદુકોણે કરી હતી.
આ અભ્યાસનો મુખ્ય ઉદ્દેશ્ય ૨૦૧૮માં કરાયેલા સર્વેની સરખામણીમાં માનસિક સ્વાસ્થ્ય અંગેની જોગૃતિ, વલણ અને વ્યવહારમાં થયેલા ફેરફારોને સમજવાનો હતો. આ માટે એલએલએલએ નવ શહેરોમાં ૩૪૯૭ સહભાગીઓના સર્વેક્ષણનું કાર્ય સત્વ કન્સલ્ટિંગને આપ્યું હતું. ૫ ઓગસ્ટથી ૯ સપ્ટેમ્બરની વચ્ચે હાથ ધરાયેલો સર્વે નવ શહેરોમાં કરવામાં આવ્યો હતો જેમાં બેંગલુરુ, દિલ્હી, ગુવાહાટી, હૈદરાબાદ, કાનપુર, કોલકાતા, મુંબઈ, પટના અને પૂણે આવેલા હતા.
આ અભ્યાસના રિપોર્ટ અનુસાર, ૯૨ ટકા લોકોએ કહ્યું કે તેઓ માનસિક બીમારીની સારવાર કરાવવા ઈચ્છે છે અને તેના માટે કોઈ વ્યક્તિની મદદ લે છે. વર્ષ ૨૦૧૮માં કરાયેલા સર્વેમાં આવો ખ્યાલ ધરાવતા લોકોની સંખ્યા માત્ર ૫૪ ટકા હતી. અનીશા પાદુકોણે,સીઇઓ એલએલએલએ જણાવ્યું હતું કે વધુ સ્વીકાર અને સંવાદ માટે માનસિક સ્વાસ્થ્ય જોગૃતિ જરૂરી છે. અમે આ પરિવર્તન જોઈને ખૂબ જ ઉત્સાહિત છીએ.
સર્વે અનુસાર, ૯૬ ટકા લોકોએ કહ્યું કે તેમની પાસે ઓછામાં ઓછી એક માનસિક બીમારી વિશે માહિતી છે. આવા લોકોમાંથી ૭૭ ટકા લોકો ડિપ્રેશનથી વાકેફ હતા અને ૬૫ ટકા લોકો માનસિક બીમારીનું મુખ્ય કારણ તણાવને માને છે. જો કે, પર્સનાલિટી ડિસઓર્ડર, ઓબ્સેસિવ કમ્પિલ્સિવ ડિસઓર્ડર,સ્ક્રિઝોફ્રેનિયા, ઈટીંગ ડિસઓર્ડર અને ચાઈલ્ડ ડિસઓર્ડર જેવી માનસિક બીમારીઓથી વાકેફ લોકોની સંખ્યા ઘણી ઓછી છે.