હિમાચલ પ્રદેશની રાજધાની શિમલામાં એક મોટો વિવાદ ફાટી નીકળ્યો છે. રામ મંદિર હોલમાં એક મુસ્લિમ છોકરીના લગ્નથી ભારે ચર્ચાઓ શરૂ થઈ છે. હિન્દુ સંગઠનોએ સખત વિરોધ વ્યક્ત કર્યો છે અને ચેતવણીઓ આપી છે. રામ મંદિરની ધર્મશાળાના મેનેજમેન્ટે પણ સ્પષ્ટતા જારી કરી છે.
શિમલામાં સૂદ સભા દ્વારા સંચાલિત રામ મંદિર હોલમાં ૧૧ એપ્રિલે એક મુસ્લિમ પરિવારની પુત્રીના લગ્નનું આયોજન છે. શિમલાની ઇદગાહ કોલોનીના રહેવાસી મોહમ્મદ નાસિર, તેમની પુત્રીના લગ્ન આ હોલમાં કરવાના છે. હિન્દુ સંઘર્ષ સમિતિએ આનો સખત વિરોધ વ્યક્ત કર્યો છે.
હિન્દુ સંઘર્ષ સમિતિએ જણાવ્યું છે કે મંદિરની મિલકત પર મુસ્લિમ પરિવારનો લગ્ન સમારોહ અસ્વીકાર્ય છે. સમિતિએ આ મુદ્દા અંગે સૂદ સભા, શિમલાને એક મેમોરેન્ડમ પણ સુપરત કર્યું છે. સમિતિના નેતાઓ વિજય શર્મા અને મદન ઠાકુરે ચેતવણી આપી છે કે જા લગ્ન રામ મંદિર હોલમાં થશે તો મોટો વિરોધ કરવામાં આવશે. તેમણે વિરોધમાં ડુક્કરનું સરઘસ અને મુંડન સમારોહનું આયોજન કરવાની ધમકી પણ આપી છે.
આ દરમિયાન, શિમલાની સૂદ સભાએ આ મુદ્દા પર અલગ વલણ અપનાવ્યું છે. સૂદ સભાના પ્રમુખ રાજીવ સૂદ કહે છે કે તેઓ બધા ધર્મોની લાગણીઓનો આદર કરે છે. તેમણે જણાવ્યું હતું કે મુસ્લિમ પરિવારો અગાઉ રામ મંદિર હોલમાં લગ્નો કરી ચુક્યા છે, અને આ કંઈ નવું નથી.
રાજીવ સૂદે એ પણ સ્પષ્ટતા કરી હતી કે ભારતનું બંધારણ અને સૂદ સભાના નિયમો કોઈપણ ધાર્મિક પ્રતિબંધોને મંજૂરી આપતા નથી. તેમણે સમજાવ્યું હતું કે આ હોલમાં માંસ, માછલી અને દારૂ પહેલાથી જ પ્રતિબંધિત છે, અને સ્વચ્છતા પર ખાસ ધ્યાન આપવામાં આવે છે. છેલ્લા પાંચ વર્ષમાં, ૧૫ થી વધુ મુસ્લિમ પરિવારોએ આ હોલમાં લગ્નો કર્યા છે. આ મુદ્દા પર વધતા વિવાદ વચ્ચે, સૂદ સભાએ મંગળવારે એક બેઠક બોલાવી છે, જ્યાં આગળના નિર્ણયો લેવામાં આવશે.
