સાવરકુંડલામાં તાલુકા પંચાયત કચેરી ખાતે આજે પ્રમુખ જીતુભાઈ કાછડીયાના અધ્યક્ષ સ્થાને મળેલ ખાસ સામાન્ય સભા અંતર્ગત સાવરકુંડલાના ગામડાઓના વિકાસ માટે જુદા જુદા ઠરાવો કરવામાં આવેલ. જેમાં તાલુકા પંચાયતના સ્વભંડોળમાં જમા થયેલ તાલુકા કક્ષાની સ્ટેમ્પ ડ્યુટી ગ્રાન્ટમાંથી કામોનું આયોજન કરવામાં આવેલ. જેમાં કુલ રૂ.૬૨ લાખના વિકાસ કામોને સર્વાનુમતે વહીવટી મંજૂરી આપવામાં આવેલ હતી. આ સામાન્ય સભાની બેઠકમાં તાલુકા પંચાયતના ઉપપ્રમુખ પરસોત્તમભાઈ ઉંમટ, કારોબારી ચેરમેન હંસાબેન ઘુસાભાઇ વાણીયા, તાલુકા પંચાયતના સદસ્યો, તાલુકા વિકાસ અધિકારી તથા દરેક વિભાગના કર્મચારીઓ ઉપસ્થિત રહ્યા હતા. આ બેઠકમાં કુલ ૨૨ સભ્યોમાંથી ૨૦ સભ્યોએ હાજર રહી વિકાસના કામોનો ઠરાવ પસાર કરી મંજૂરી આપેલ હતી. આ સમગ્ર સામાન્ય સભાનું સંચાલન વિસ્તરણ અધિકારી કાકડીયાભાઈ દ્વારા કરવામાં આવેલ હતું. અંતે આ સભાના અધ્યક્ષ જીતુભાઈ કાછડીયા દ્વારા આભાર વિધિ કરી સભા પૂર્ણ કરવામાં આવેલ.
