સાવરકુંડલા તાલુકાના છેવાડે આવેલા દેતડ ગામના ગ્રામજનો અને ખેડૂતો ૨૦ વર્ષથી તેમના ખેતરો અને નજીકના ભાક્ષી ભંડારીયા ગામને જોડતા એકમાત્ર રસ્તાની અત્યંત બેહાલ સ્થિતિને કારણે ભારે મુશ્કેલીનો સામનો કરી રહ્યા છે. ચોમાસાના ચાર મહિના દરમિયાન કાદવ-કીચડની સ્થિતિ એટલી ખરાબ થઈ જાય છે કે વાહનો ચલાવીને ખેતરોમાં પહોંચવું અશક્ય બને છે અને ખેડૂતોને માત્ર પગપાળા જવું પડે છે. આ રસ્તો ખેતીના માધ્યમથી જીવન નિર્વાહ કરતા ગ્રામવાસીઓ માટે રોજિંદા જીવનનો આધાર છે. છેલ્લા ૨૦ વર્ષમાં ગ્રામજનોએ વારંવાર સ્થાનિક તાલુકા કચેરીથી લઈને ગાંધીનગર સુધી લેખિત અને મૌખિક રજૂઆતો કરી છે, તેમ છતાં રસ્તાની હાલતમાં કોઈ સુધારો થયો નથી. આખરે, કંટાળીને ગ્રામજનો અને ખેડૂતોએ સરકારી અવગણના સામે સ્વમહેનતથી રસ્તાના રિપેરીંગની કામગીરી શરૂ કરી દીધી છે. ગામના યુવાનો અને મહિલાઓ પણ પોતાના સાધનો અને મજૂરીથી આ રસ્તાને સુધારવાનો પ્રયાસ કરી રહ્યા છે.
