સૌરાષ્ટ્રમાં કમોસમી વરસાદને કારણે ખેડૂતોના તૈયાર પાકને વ્યાપક નુકસાન થયું છે. અમરેલી જિલ્લાના સાવરકુંડલા તાલુકાના જાબાળ ગામના ખેડૂત મુકેશભાઈએ ભારે રોષ વ્યક્ત કર્યો છે. તેમની ૭ વીઘા જમીનમાં તૈયાર મગફળીનો પાક વરસાદથી સંપૂર્ણ પલળી જતાં, તેમણે સરકાર સુધી વિરોધ પહોંચાડવા મગફળીના પાથરા સળગાવી દીધા હતા. આ ઘટનાનો વીડિયો સોશિયલ મીડિયા પર વાયરલ થયો છે, જે ખેડૂતોની વેદના દર્શાવે છે. હજી સુધી સહાય પેકેજ જાહેર ન થતાં ખેડૂતોમાં આક્રોશ છે. ખેડૂતો તાત્કાલિક યોગ્ય વળતર મળે તેવી માંગ કરી રહ્યા છે, જેથી નુકસાનગ્રસ્ત ખેડૂતોને રાહત મળી શકે.
