ઉત્તર પ્રદેશના સંભલમાં ગયા વર્ષે ફાટી નીકળેલી હિંસાના કેસમાં હવે કોર્ટ કાર્યવાહી આગળ વધશે. સંભલની શાહી જામા મસજીદમાં થયેલી હિંસા દરમિયાન પાંચ લોકોના મોત થયાના લગભગ છ મહિના પછી, સ્થાનિક કોર્ટે ૫૦ આરોપીઓ સામે આરોપો ઘડ્યા છે. આનાથી ટ્રાયલ શરૂ થવાનો માર્ગ મોકળો થયો છે. એડીજે(એસસી–એસટી એક્ટ) રાગિની સિંહની કોર્ટે સાંજે આ આદેશ આપ્યો, જેમાં બચાવ પક્ષ દ્વારા દાખલ કરાયેલી અનેક ડિસ્ચાર્જ અરજીઓને ફગાવી દેવામાં આવી. હવે કોર્ટમાં સુનાવણીની ગતિ વધવાની અપેક્ષા છે.
ગયા વર્ષે ૨૪ નવેમ્બરની સવારે એક સર્વે દરમિયાન સંભલ જામા મસજીદમાં હિંસા ફાટી નીકળી હતી. જામા મસજીદ મૂળરૂપે હરિહર મંદિર હોવાનો દાવો કરવામાં આવ્યો હતો. આ અથડામણમાં પાંચ લોકો માર્યા ગયા હતા અને ઘણા પોલીસકર્મીઓ ઘાયલ થયા હતા. આ ઘટનાના સંદર્ભમાં પોલીસે ૮૦ થી વધુ લોકોની ધરપકડ કરી હતી. અત્યાર સુધીમાં ચાર આરોપીઓને અલ્હાબાદ હાઈકોર્ટમાંથી જામીન મળી ગયા છે. જોકે, તેને હજુ સુધી મુક્ત કરવામાં આવ્યો નથી.
પોલીસે આરોપીઓ સામે એકત્રિત કરેલા પુરાવાઓની વિગતો આપતા ચાર્જશીટ પહેલાથી જ દાખલ કરી દીધી હતી. પરંતુ સાંજે કોર્ટ દ્વારા આરોપો ઘડવામાં આવ્યા પછી જ કેસ ઔપચારિક રીતે ટ્રાયલ માટે આગળ વધશે. સહાયક જિલ્લા સરકારી વકીલ હરિઓમ પ્રકાશ સૈનીએ જણાવ્યું હતું કે કેટલાક આરોપીઓ વતી ચારથી પાંચ વકીલોએ ડિસ્ચાર્જ અરજીઓ રજૂ કરી હતી.
હરિઓમ પ્રકાશ સૈનીએ કહ્યું કે ડિસ્ચાર્જ અરજીઓમાં દલીલ કરવામાં આવી હતી કે તેમના અસીલોના નામ એફઆઇઆરમાં નથી. તેમને કોઈ પણ આધાર વગર તેમના ઘરેથી ઉપાડી લેવામાં આવ્યા હતા. તેમણે દાવો કર્યો હતો કે આરોપીઓ હિંસામાં સામેલ નહોતા. મેં કોર્ટને કહ્યું કે તપાસ દરમિયાન બધા નામ સામે આવ્યા છે. પોલીસ ફાઇલમાં રહેલા વિડીયો ફૂટેજ અને અન્ય પુરાવાઓ દ્વારા આ વાતને સમર્થન આપવામાં આવ્યું હતું.
સરકારી વકીલે કહ્યું કે અમે કોર્ટને કહ્યું કે તમામ ૫૦ આરોપીઓ સામે કાર્યવાહી કરવા માટે પૂરતા પુરાવા છે. બંને પક્ષોને સાંભળ્યા પછી, કોર્ટે ડિસ્ચાર્જ અરજીઓ ફગાવી દીધી અને રમખાણો અને હત્યા સહિત સંબંધિત કલમો હેઠળ આરોપો ઘડ્યા. આ કેસની તપાસ કરી રહેલી એસઆઇટીએ હિંસા પાછળના મુખ્ય કાવતરાખોર તરીકે કથિત ગેંગસ્ટર શારિક સાથાની ઓળખ કરી હતી. જામા મસજીદ કમિટીના વડા ઝફર અલીની પણ કાવતરામાં કથિત ભૂમિકા બદલ ધરપકડ કરવામાં આવી હતી અને જેલમાં મોકલવામાં આવ્યા હતા.
