શ્રી નૂતન કેળવણી મંડળ સાવરકુંડલા દ્વારા તા. ૨૩ બુધવારના રોજ સંસ્થા સંચાલિત તમામ શાળા, કોલેજ અને છાત્રાલયના કર્મચારીઓનું પ્રથમ સત્રાંત મિલન અને સન્માન સમારોહનું આયોજન કરવામાં આવ્યું હતું. આ પ્રસંગે જે.વી. મોદી હાઇસ્કૂલના સંગીત શિક્ષક સંજયભાઈ એમ. મહેતાને સંગીત ક્ષેત્રે ઉત્તમ પ્રદાન બદલ તેમજ ભૂતપૂર્વ વિદ્યાર્થી ચંદ્રેશભાઇ બોરીસાગરને શિક્ષણમાં ઉત્કૃષ્ટ યોગદાન બદલ સન્માનિત કરવામાં આવ્યા હતા. કાર્યક્રમમાં લોકભારતી યુનિવર્સિટીના વાઇસ ચાન્સેલર ડા. રાજેન્દ્રભાઈ ખીમાણી, જિલ્લા શિક્ષણ અધિકારી ગોહિલ તેમજ કવિ અને શિક્ષણવિદ મનોહરભાઈ ત્રિવેદીની વિશેષ ઉપસ્થિતિ રહી હતી. મહાનુભાવોએ શિક્ષણની બદલાતી ક્ષિતિજો અને નવી તરાહો વિશે માર્ગદર્શન આપ્યું હતું, જ્યારે મનોહરભાઈ ત્રિવેદીએ પોતાની આગવી શૈલીથી કર્મચારીઓમાં ઉત્સાહનો સંચાર કર્યો હતો.કાર્યક્રમની શરૂઆતમાં મેનેજિંગ ટ્રસ્ટી મુકુંદભાઈ નાગ્રેચાએ સ્વાગત પ્રવચન કર્યું હતું. બંને સન્માનિત શિક્ષકોને ઘેલાણી ટ્રસ્ટ દ્વારા રૂ. ૫૧૦૦નો રોકડ પુરસ્કાર એનાયત કરવામાં આવ્યો હતો. સમગ્ર કાર્યક્રમનું સંચાલન ટ્રસ્ટી વિનુભાઈ રાવળે કર્યું હતું, જ્યારે સંસ્થાના પ્રમુખ ચંદ્રિકાબેન કામદારે આભારવિધિ કરી હતી.
