કોંગ્રેસના નેતા સચિન પાયલોટે કહ્યું કે વિપક્ષ સરકાર પાસે સંસદનું ખાસ સત્ર બોલાવવાની માંગ કરી રહ્યું છે અને આનાથી પાકિસ્તાન પ્રાયોજિત આતંકવાદ સામે ભારતની લડાઈમાં સમગ્ર વિશ્વને એકતાનો સંદેશ મળશે. સચિન પાયલોટે કહ્યું કે પહેલગામ આતંકવાદી હુમલા પછી સરકારને કેવો પ્રતિભાવ આપવો જોઈએ તે અંગે દેશ અને વિપક્ષ તરફથી સરકારને જે સમર્થન મળ્યું છે તે અભૂતપૂર્વ અને બિનશરતી છે.
રોહતકના સાંસદ દીપેન્દ્ર સિંહ હુડ્ડા અને હરિયાણાના અન્ય કોંગ્રેસ નેતાઓ સાથે અહીં એક પત્રકાર પરિષદને સંબોધતા સચિન પાયલોટે કહ્યું કે, અમે સંસદનું ખાસ સત્ર બોલાવવાની માંગ કરી હતી જેથી દુનિયાભરમાં સંદેશ જાય કે સમગ્ર ભારત દેશની સાર્વભૌમત્વ અને અખંડિતતા માટે એક છે. અને પાકિસ્તાન પ્રાયોજિત આતંકવાદનો અંત લાવવાની આ લડાઈમાં આપણે એક છીએ.
પાયલોટે કહ્યું કે પહેલગામ આતંકવાદી હુમલાને પગલે વિવિધ દેશોની મુલાકાત લઈ રહેલા બહુપક્ષીય પ્રતિનિધિમંડળને મોકલતા પહેલા સંસદનું સત્ર બોલાવવામાં આવ્યું હોત તો તેમના વિચારો વ્યક્ત કરવાની વધુ શક્તિ મળી હોત.
રાજસ્થાનના ભૂતપૂર્વ નાયબ મુખ્યમંત્રી પાયલટ અહીં જય હિંદ સભાના પ્રસંગે મીડિયાને સંબોધિત કરી રહ્યા હતા. સશસ્ત્ર દળોના સર્વોચ્ચ બહાદુરી અને સફળતાને સલામ કરવા માટે કોંગ્રેસ સમગ્ર ભારતમાં આ મેળાવડાનું આયોજન કરી રહી છે. કોંગ્રેસના મહાસચિવ અને સંગઠન પ્રભારી કેસી વેણુગોપાલે સોશિયલ મીડિયા પ્લેટફોર્મ ઠ પર તાજેતરની પોસ્ટમાં કહ્યું હતું કે આ બેઠકોમાં ભૂતપૂર્વ સૈન્ય જવાનો, પાર્ટીના નેતાઓ અને સામાન્ય લોકો હાજરી આપશે.
ઓપરેશન સિંદૂરનો ઉલ્લેખ કરતા પાયલોટે કહ્યું કે પહેલગામ આતંકવાદી હુમલા પછી, કોંગ્રેસે સરકારને સંપૂર્ણ સમર્થન આપ્યું હતું જેથી આ કાયરતાપૂર્ણ ઘટનાના ગુનેગારોને યોગ્ય જવાબ આપી શકાય. આ હુમલામાં ૨૬ લોકો માર્યા ગયા હતા. તેમણે કહ્યું કે આપણે બધાને આપણા સશસ્ત્ર દળો પર ગર્વ છે, પરંતુ મને દુઃખ થાય છે જ્યારે મધ્યપ્રદેશના મંત્રી વિજય શાહ અને હરિયાણાના રાજ્યસભા સભ્ય રામ ચંદ્ર જાંગરા જેવા જવાબદાર હોદ્દા ધરાવતા કેટલાક વરિષ્ઠ ભાજપના નેતાઓ આપણા બહાદુર લશ્કરી અધિકારીઓ અને પહેલગામ હુમલામાં શહીદ થયેલા લોકો અને તેમના પરિવારો સામે અપશબ્દોનો ઉપયોગ કરે છે.
પાયલોટે પૂછ્યું કે શું ભાજપ આવા નેતાઓ સામે કોઈ કાર્યવાહી કરશે અને તેમને તેમના પદ પરથી દૂર કરશે? કોંગ્રેસ નેતાએ કહ્યું કે સરકારે અમેરિકાના રાષ્ટ્રપતિ ડોનાલ્ડ ટ્રમ્પના દાવાને નકારી કાઢ્યો નથી કે તેમણે ભારત અને પાકિસ્તાન વચ્ચેના તાજેતરના સંઘર્ષને વેપાર દ્વારા ઉકેલ્યો છે અને આ વાત ભારત સરકારના ઉચ્ચ સ્તરથી આવવી જોઈએ.તેમણે કહ્યું કે આ આઠમી વખત છે જ્યારે રાષ્ટ્રપતિ ટ્રમ્પે દાવો કર્યો છે કે તેમણે ભારત અને પાકિસ્તાન વચ્ચેના લશ્કરી સંઘર્ષને સમાપ્ત કરવામાં મદદ કરી છે. તેમણે આ જાહેરાત પર સરકાર પાસેથી સ્પષ્ટતા પણ માંગી. કોંગ્રેસ નેતાએ એમ પણ કહ્યું કે યુદ્ધવિરામની ઘોષણા કરવામાં આવી છે પરંતુ સરકારે સ્પષ્ટતા કરવી જાઈએ કે શું તેને ખાતરી આપવામાં આવી છે કે પાકિસ્તાન ભવિષ્યમાં કોઈ દુષ્પ્રેરણા નહીં કરે.
ભારત અને પાકિસ્તાન વચ્ચે લશ્કરી સંઘર્ષ અટકાવવા માટે કરારની ઘોષણાનો ઉલ્લેખ કરતા પાયલોટે કહ્યું કે, સમગ્ર મામલામાં ન તો અમેરિકી રાષ્ટ્રપતિ, ન તો ઉપરાષ્ટ્રપતિ કે ન તો અમેરિકી સરકારે એક પણ વાર આતંકવાદ શબ્દનો ઉપયોગ કર્યો છે. તેમણે કહ્યું કે અમેરિકા લશ્કરી સંઘર્ષ રોકવાનો શ્રેય લેવાનો પ્રયાસ કરી રહ્યું છે, પરંતુ શું તેણે ભારતને આશ્વાસન આપ્યું? આ મહત્વપૂર્ણ પ્રશ્નો છે જેના જવાબ આપવા જ જોઈએ.
જ્યારે તેમને પૂછવામાં આવ્યું કે પાકિસ્તાનને આતંકવાદના પ્રાયોજક રાજ્ય તરીકે વૈશ્વીક સ્તરે ઉજાગર કરવા માટે ભારતે વધુ શું કરવાની જરૂર છે, ત્યારે કોંગ્રેસના નેતાએ ઇસ્લામાબાદ દ્વારા ફેલાવવામાં આવી રહેલી ખોટી માહિતી અને ખોટા પ્રચારનો અસરકારક રીતે સામનો કરવાની જરૂરિયાત પર ભાર મૂક્યો.પાયલોટે કહ્યું કે મને લાગે છે કે પાકિસ્તાન લાંબા સમયથી આતંકવાદને પ્રાયોજિત કરી રહ્યું છે તે સાબિત કરવા માટે પૂરતા મજબૂત પુરાવા છે. પાકિસ્તાન સરકારની ખરી ચાવી પાકિસ્તાની સેના પાસે છે. તેમને સમજાયું છે કે તેઓ પરંપરાગત રીતે ભારત સાથે સ્પર્ધા કરી શકતા નથી, પરંતુ તેઓ ચીનની મદદથી ભારતને નુકસાન પહોંચાડવા માંગે છે. પહેલા તેઓએ લાંબા સમય સુધી પંજાબમાં અને હવે કાશ્મીરમાં આતંકવાદને પ્રાયોજિત કર્યો. તેમણે કહ્યું કે મને લાગે છે કે આપણે ઘણું બધું કરવું પડશે કારણ કે વૈશ્વીક મંચ પર પાકિસ્તાન પ્રત્યે જે પ્રકારની નિંદા થવી જોઈતી હતી તે થઈ નથી.
