સાવરકુંડલા શહેરમાં મૂલ્યનિષ્ઠ શિક્ષણની આવશ્યકતાને ધ્યાનમાં રાખીને સત્ય પ્રેમ કરુણા ટ્રસ્ટ દ્વારા એક નવી શૈક્ષણિક સંસ્થા શરૂ કરવાનું આયોજન કરવામાં આવી રહ્યું છે. આ સંસ્થા ભારતીય વૈદિક મૂલ્યો અને લલ્લુભાઈ શેઠની વિચારધારાને અનુસરશે. સંસ્થા ધોરણ ૧થી ૮ સુધીની ગુજરાતી અને અંગ્રેજી માધ્યમની શાળા શરૂ કરવાનું આયોજન કરી રહી છે. આ પ્રોજેક્ટ માટે, ટ્રસ્ટે શહેરની મધ્યમાં આવેલી પ્રતિષ્ઠિત બનજારા હાઈસ્કૂલ અને કુમાર શાળાના બિલ્ડિંગને પસંદ કર્યું છે. સત્ય પ્રેમ કરુણા ટ્રસ્ટે આ બિલ્ડિંગ માટે યોગ્ય ટોકન રકમ અથવા નિર્ધારિત રકમ ચૂકવવાની તૈયારી દર્શાવી છે. શહેરના બુદ્ધિજીવી વર્ગ દ્વારા પણ આ પહેલને સમર્થન મળી રહ્યું છે. તેઓનું માનવું છે કે જો બનજારા હાઈસ્કૂલ અને કુમાર શાળાના વર્તમાન ટ્રસ્ટીઓ આ જગ્યા સત્ય પ્રેમ કરુણા ટ્રસ્ટને ફાળવે તો સાવરકુંડલાના શૈક્ષણિક ભવિષ્યને નવી દિશા મળશે. હવે સૌની નજર બનજારા હાઈસ્કૂલ અને કુમાર શાળાના ટ્રસ્ટીઓના નિર્ણય પર છે. શહેરના શૈક્ષણિક ભવિષ્ય માટે તેઓ કેવો નિર્ણય લે છે તે જોવાનું રહ્યું.
