સ્ટુડન્ટ પોલીસ કેડેટ યોજના અંતર્ગત સાવરકુંડલા રૂરલ પોલીસ સ્ટેશન દ્વારા બાઢડા હાઈસ્કૂલ ખાતે વિદ્યાર્થિનીઓને સ્વરક્ષણની તાલીમ આપવામાં આવી હતી. આ કાર્યક્રમમાં વિદ્યાર્થિનીઓએ ઉત્સાહભેર ભાગ લીધો હતો. પોલીસ દ્વારા વિદ્યાર્થિનીઓને પોલીસ સ્ટેશનની મુલાકાત કરાવવામાં આવી હતી, જ્યાં તેમને હથિયાર અંગેની માહિતી અને વ્યસનમુક્તિ માટે જરૂરી માર્ગદર્શન આપવામાં આવ્યું હતું. આ ઉપરાંત, જાગૃતિ માટેનું સાહિત્ય પણ વહેંચવામાં આવ્યું હતું. વિદ્યાર્થિનીઓને ટ્રાફિક અંગેની વિસ્તૃત સમજણ આપવામાં આવી હતી. આમાં ટ્રાફિકના નિયમો, સમસ્યાઓ, અકસ્માત નિવારણ માટેના પગલાં અને લોક જાગૃતિ વિશે માહિતી આપવામાં આવી હતી. આ હેતુ માટે શાળા અને હાઈસ્કૂલમાં સેમિનાર અને
જાગૃતિ કાર્યક્રમોનું આયોજન કરવામાં આવ્યું હતું. હાઈસ્કૂલમાં ધોરણ ૯થી ૧૨ની વિદ્યાર્થીનીઓનું કાઉન્સેલિંગ કરવામાં આવ્યું હતું. સ્ટુડન્ટ પોલીસ કેડેટ યોજના અંતર્ગત વિદ્યાર્થિનીઓને દેશના સારા નાગરિક બનવા માટે વિવિધ વિષયો પર પ્રશિક્ષણ આપવામાં આવ્યું હતું. બાઢડા હાઈસ્કૂલની વિદ્યાર્થિનીઓને મેદાન પર ડ્રિલની તાલીમ આપવામાં આવી હતી. ગુનાઓ અટકાવવા માટે બહોળી પ્રસિદ્ધિ, પ્રચાર અને કેમ્પેઈનનું આયોજન કરવામાં આવ્યું હતું. બાઢડા ગામે રૂરલ પોલીસ દ્વારા હાઈસ્કૂલની વિદ્યાર્થિનીઓને સ્વરક્ષણ, જુડો અને કરાટેની તાલીમ આપવામાં આવી હતી, જેથી દીકરીઓ પોતાનું રક્ષણ કરી શકે.
