વડિયાના ગાંધી ચોક વિસ્તારમાં રામજી મંદિર ખાતે નિવાસ કરતા નિરાધાર સાધુ નારણદાસ બાપુનું નિધન થતા સમગ્ર પંથકમાં કરુણતા વ્યાપી હતી. લાંબા સમયથી ભક્તિમય જીવન ગાળતા આ સાધુની માંદગી દરમિયાન સ્થાનિક અગ્રણીઓએ ભોજન અને સેવાની જવાબદારી ઉઠાવી હતી. બાપુના અવસાન બાદ તેમનો કોઈ વારસદાર ન હોવા છતાં, સરપંચ મનીષભાઈ ઢોલરિયા અને ચેમ્બર ઓફ કોમર્સના પ્રમુખ મિતુલભાઈ ગણાત્રા સહિતના આગેવાનોએ ખભેખભો મિલાવી શાસ્ત્રોક્ત વિધિથી સ્મશાન યાત્રા કાઢી હતી. વિશેષમાં, સાધુના આત્માની શાંતિ અર્થે આગામી શનિવારે બટુક ભોજનનું આયોજન કરાયું છે, જેમાં વાલ્મિકી સમાજે પણ આર્થિક યોગદાન આપી ઉમદા ઉદાહરણ પૂરું પાડ્યું છે. આમ, વડિયાના નાગરિકોએ એક નિરાધાર સંતને સન્માનપૂર્વક વિદાય આપી માનવતા મહેકાવી છે.
