ઉત્તર પ્રદેશના લખનૌના મોહનલાલગંજ કોતવાલી વિસ્તારમાં કિસાન પથ પર એક ડબલ ડેકર બસમાં આગ લાગી હતી, જેમાં પાંચ મુસાફરો બળીને ખાખ થઈ ગયા હતા. આ અકસ્માતમાં ઘણા લોકો ઘાયલ થયા છે, જેમને હોસ્પિટલમાં દાખલ કરવામાં આવ્યા છે. મૃતકોમાં બે મહિલાઓ અને એક બાળકનો સમાવેશ થાય છે. ગુરુવારે સવારે ૫.૦૦ વાગ્યાની આસપાસ બસ બિહારના બેગુસરાયથી દિલ્હી તરફ જઈ રહી હતી ત્યારે આ ઘટના બની. આગ લાગતા જ ડ્રાઇવર અને ક્લીનર બસમાંથી કૂદી પડ્યા અને ભાગી ગયા. બસમાંથી બે સિલિન્ડર પણ મળી આવ્યા હતા. ગિયર બોક્સ પાસે આગ લાગી હતી.
સવારે અચાનક બસમાં આગ લાગી ગઈ, જેના કારણે લોકોમાં ગભરાટ ફેલાયો. સ્થાનિક લોકો અને મુસાફરોએ તાત્કાલિક પોલીસ અને ફાયર વિભાગને જાણ કરી. અડધા ડઝનથી વધુ ફાયર એÂન્જન ઘટનાસ્થળે પહોંચ્યા અને કલાકોની મહેનત બાદ આગ પર કાબુ મેળવ્યો. આગ એટલી ભયાનક હતી કે બસ સંપૂર્ણપણે બળીને રાખ થઈ ગઈ.
પોલીસ અધિકારીઓના જણાવ્યા અનુસાર, પ્રાથમિક તપાસમાં જાણવા મળ્યું છે કે બસના ગિયર બોક્સમાં શોર્ટ સર્કિટને કારણે આગ લાગી હતી. સૂત્રોએ જણાવ્યું હતું કે બસમાં લગભગ ૮૦ મુસાફરો હતા અને તે સમયે બધા મુસાફરો સૂઈ રહ્યા હતા. આગ એટલી ભયંકર હતી કે તેની જ્વાળાઓ એક કિલોમીટર દૂર સુધી દેખાતી હતી. ઘટનાસ્થળે પહોંચેલા ફાયર બ્રિગેડના કર્મચારીઓએ લગભગ અડધા કલાકની મહેનત બાદ આગ પર કાબુ મેળવ્યો હતો. અકસ્માત બાદ જાણવા મળ્યું કે બસનો ઇમરજન્સી દરવાજા ખુલ્યો ન હતો, જેના કારણે મુસાફરોને બહાર નીકળવામાં મુશ્કેલી પડી રહી હતી. આના કારણે ઘણા લોકો ફસાયેલા રહ્યા અને મૃત્યુ પામ્યા.
ભારે પોલીસ દળ અને પીજીઆઈની ટીમ પણ ઘટનાસ્થળે પહોંચી ગઈ. પોલીસે બસમાંથી મૃતક મુસાફરોના મૃતદેહ બહાર કાઢ્યા અને એમ્બ્યુલન્સની મદદથી પોસ્ટમોર્ટમ માટે મોકલી આપ્યા. ઘટનાસ્થળે હાજર પોલીસ અધિકારીઓએ ઘટનાની તપાસ શરૂ કરી દીધી છે. આ ઘટનામાં પાંચ મુસાફરોના મૃત્યુની પુષ્ટિ થઈ છે, જેમના મૃતદેહને પોસ્ટમોર્ટમ માટે મોકલી દેવામાં આવ્યા છે. મૃતકોના પરિવારજનોને જાણ કરવામાં આવી છે.
