રાજુલા-સાવરકુંડલા રોડ પર ઝાપોદર અને આગરીયા ગામની વચ્ચે એક ગંભીર અકસ્માત સર્જાયો હતો. આ અકસ્માતમાં એક મોટરસાયકલ અને ફોરવ્હીલ કેરી ગાડી સામસામે અથડાયા હતા, જેના પરિણામે મોટરસાયકલ પર સવાર બંને વ્યક્તિઓને ગંભીર ઈજાઓ પહોંચી હતી. અકસ્માત એટલો ભયાનક હતો કે કેરી ગાડી મોટરસાયકલ સાથે અથડાયા બાદ રોડની બીજી તરફના ઇલેક્ટ્રિક થાંભલા સાથે પણ અથડાઈ હતી. આ ટક્કરના કારણે ઇલેક્ટ્રિક થાંભલો તૂટી ગયો હતો અને સમગ્ર વિસ્તારમાં વીજ પુરવઠો ખોરવાઈ ગયો હતો. ઘટનાની જાણ થતાં જ તાત્કાલિક ૧૦૮ એમ્બ્યુલન્સ ઘટનાસ્થળે પહોંચી ગઈ હતી અને ગંભીર રીતે ઘાયલ બંને વ્યક્તિઓને સારવાર માટે રાજુલાની એક ખાનગી હોસ્પિટલમાં ખસેડવામાં આવ્યા હતા. પ્રાથમિક માહિતી અનુસાર, આ બંને વ્યક્તિઓ રાજુલા પાસેના ભાક્ષી ગામના રહેવાસી છે, જેમનું નામ જીગ્નેશભાઈ પીપળીયા અને પ્રાગજીભાઈ પાંડવ હોવાનું જાણવા મળ્યું છે. આ અકસ્માતની જાણ થતાં જ રાજુલા પોલીસ પણ ઘટનાસ્થળે દોડી આવી હતી અને સમગ્ર મામલાની તપાસ શરૂ કરી દીધી છે. આ ઘટનાને પગલે વિસ્તારમાં થોડા સમય માટે અફરાતફરીનો માહોલ સર્જાયો હતો.
