રાજુલાની ભુતા વોરા જનરલ હોસ્પિટલમાં રોજબરોજ ૫૦૦ થી ૬૫૦ જેટલા દર્દીઓ સારવાર માટે આવે છે. રાજુલા, જાફરાબાદ તથા આસપાસના ૧૦૦ જેટલા ગામોના લોકો માટે આ હોસ્પિટલ મુખ્ય આરોગ્ય કેન્દ્ર છે. આધુનિકીકરણ થયા છતાં હોસ્પિટલમાં મૂળભૂત સુવિધાઓની તંગી છે. ખાસ કરીને એક જ કેસબારી હોવાને કારણે દર્દીઓને લાંબી લાઈનોમાં કલાકો સુધી ઊભા રહેવું પડે છે. તાત્કાલિક સારવાર માટે આવેલા દર્દીઓ પણ આ વિલંબથી પરેશાન થાય છે. આરોગ્ય સેવા માટે રચાયેલી આધુનિક બિલ્ડિંગ હોવા છતાં સ્ટાફની અછત અને વ્યવસ્થાપનના અભાવે દર્દીઓને અસુવિધા વેઠવી પડે છે. સ્થાનિક જનતાએ તાત્કાલિક વધારાની કેસબારીઓ ખોલવા તેમજ આરોગ્ય સુવિધાઓમાં વધારો કરવાની માંગ ઉઠાવી છે.
