રાજસ્થાનના ઝાલાવાડમાં એક સરકારી શાળામાં છત તૂટી પડવાથી ૭ બાળકોના મૃત્યુ બાદ, શાળાની ઇમારતો અંગે ચિંતા વ્યક્ત થવા લાગી છે. એક અહેવાલમાં ખુલાસો થયો છે કે રાજ્યમાં ૨,૭૧૦ શાળાની ઇમારતોને મોટા સમારકામની જરૂર છે અને આ માટે ફાળવવામાં આવેલા રૂ. ૨૫૪ કરોડની રકમ હજુ સુધી નાણાં વિભાગ તરફથી મંજૂરી મળી નથી. પીટીઆઈ ભાષા દ્વારા પ્રાપ્ત રાજ્ય શિક્ષણ વિભાગના અહેવાલ મુજબ, ૨૦૨૪-૨૫ નાણાકીય વર્ષમાં ૨,૭૧૦ શાળાની ઇમારતોને મોટા સમારકામની જરૂર તરીકે ઓળખવામાં આવી છે અને તેમના નવીનીકરણ માટે રૂ. ૭૯.૨૪ કરોડ અલગ રાખવામાં આવ્યા છે.
ચાલુ નાણાકીય વર્ષમાં, આવી ૨,૦૦૦ વધુ અસુરક્ષિત શાળાઓની યાદી બનાવવામાં આવી છે, જેના માટે તેમના સમારકામ માટે રૂ. ૧૭૪.૯૭ કરોડનું અલગ બજેટ જાહેર કરવામાં આવ્યું છે. જોકે, અહેવાલમાં જણાવાયું છે કે મોટાભાગના ભંડોળ હજુ સુધી નાણાં વિભાગ દ્વારા મંજૂર કરવામાં આવ્યા નથી, જે વહીવટી વિલંબ અને બજેટ અમલીકરણ પર ગંભીર પ્રશ્નો ઉભા કરે છે. અહેવાલમાં જાહેર કરવામાં આવ્યું છે કે ૨૦૨૪-૨૫ અને ૨૦૨૫-૨૬ માટે શિક્ષણ વિભાગના જોખમ મૂલ્યાંકનમાં ઝાલાવાડ જિલ્લામાં ૮૩ ઇમારતોના માળખા ઓળખવામાં આવ્યા હતા.
શુક્રવારે સવારે પ્રાર્થના દરમિયાન ઝાલાવાડના પીપલોડી ગામમાં સરકારી ઉચ્ચ પ્રાથમિક શાળાની છતનો એક ભાગ તૂટી પડતાં સાત બાળકોના મોત થયા હતા અને ૨૮ અન્ય ઘાયલ થયા હતા. આ દુર્ઘટના અંગે લોકોનો આક્રોશ ચાલુ છે, ત્યારે પીપલોડીમાં ધરાશાયી થયેલી શાળાની ઇમારતને તાત્કાલિક તોડી પાડવાના સ્થાનિક વહીવટીતંત્રની પણ પુરાવાનો નાશ કરવા બદલ ટીકા થઈ રહી છે.
કોંગ્રેસના નેતા પ્રમોદ જૈન ભાયાએ કહ્યું, “ઝાલાવાડ જિલ્લા વહીવટીતંત્રે જે રીતે ઇમારતનું માળખું તોડી પાડવાની ઉતાવળ કરી તે ગંભીર પ્રશ્નો ઉભા કરે છે. તે પુરાવાનો નાશ કરવાનો પ્રયાસ લાગે છે.” જર્જરિત શાળાની ઇમારતોમાં દિવાલ ધરાશાયી થવાની ઘટનાઓ અન્ય ઘણા જિલ્લાઓમાં પણ નોંધાઈ છે. ભાજપના વરિષ્ઠ નેતા અને ભૂતપૂર્વ કેબિનેટ મંત્રી પ્રતાપ સિંહ સિંઘવીએ ચિÂહ્નત ઇમારતો પર કાર્યવાહી કરવામાં અમલદારશાહી વિલંબની ટીકા કરી હતી.
