રશિયા અને યુક્રેન વચ્ચે ચાલી રહેલા યુદ્ધે ફરી એકવાર તીવ્ર સ્વરૂપ ધારણ કર્યું છે. શુક્રવારે રાત્રે બંને દેશોએ એકબીજા પર ભીષણ હવાઈ હુમલા કર્યા, જેમાં બંને બાજુ બે નાગરિકો માર્યા ગયા. આ ઉપરાંત, ઘણા વિસ્તારોમાં સંપત્તિને ભારે નુકસાન થયું છે.
યુક્રેનના દક્ષિણ ડનીપ્રો અને ઉત્તર-પૂર્વ સુમી પ્રદેશોમાં રોકેટ અને ડ્રોનથી સંયુક્ત હુમલો કરવામાં આવ્યો. ડનીપ્રો પ્રાદેશિક વહીવટી વડા સેર્હી લિસાકના જણાવ્યા અનુસાર, ત્યાં બે લોકો માર્યા ગયા અને પાંચ ઘાયલ થયા. ડનીપ્રો શહેરમાં થયેલા હુમલામાં એક બહુમાળી ઇમારત, વ્યવસાય સંકુલ અને શોપિંગ સેન્ટરને નુકસાન થયું, જ્યાં આગ પણ લાગી. સુમીમાં ત્રણ લોકો ઘાયલ પણ થયા છે.
યુક્રેનના બીજા સૌથી મોટા શહેર ખાર્કિવમાં પણ રાતોરાત ત્રણ કલાક સુધી સતત બોમ્બમારો જોવા મળ્યો. શહેર પર ચાર માર્ગદર્શિત હવાઈ બોમ્બ, બે બેલીસ્ટીક મિસાઇલ અને ૧૫ ડ્રોન છોડવામાં આવ્યા. ખાર્કિવના મેયર ઇહોર તેરેખોવે ટેલિગ્રામ પર જણાવ્યું હતું કે હુમલામાં રહેણાંક ઇમારતો, સ્થાનિક વ્યવસાયિક સંસ્થાઓ, રસ્તાઓ અને સંદેશાવ્યવહાર નેટવર્કને ખરાબ રીતે અસર થઈ છે.
યુક્રેનિયન વાયુસેનાના અહેવાલ મુજબ, રશિયાએ રાત્રે ૨૦૮ ડ્રોન અને ૨૭ મિસાઇલો છોડ્યા. આમાંથી ૧૮૩ ડ્રોન અને ૧૭ મિસાઇલો યુક્રેનની હવાઈ સંરક્ષણ અને ઇલેક્ટ્રોનિક સિસ્ટમ દ્વારા નાશ પામ્યા અથવા અવરોધિત થયા હોવાનો દાવો કરવામાં આવ્યો હતો. જાકે, ૧૦ મિસાઇલો અને ૨૫ ડ્રોન નવ અલગ અલગ સ્થળોએ લક્ષ્યોને ફટકારવામાં સફળ રહ્યા હતા.બીજી બાજુ, રશિયાના રોસ્ટોવ ક્ષેત્રમાં યુક્રેનિયન ડ્રોન હુમલામાં બે નાગરિકો માર્યા ગયા. આ વિસ્તાર યુક્રેનિયન સરહદની નજીક છે. ડ્રોન હુમલાઓ સ્ટેવ્રોપોલ, મોસ્કો, પેન્ઝા, બ્રાયન્સ્ક, ક્રિમીઆ, તુલા, ઓર્લોવ અને બેલ્ગોરોડ પ્રદેશોમાં પણ થયા હતા. રશિયન સંરક્ષણ મંત્રાલયે દાવો કર્યો હતો કે તેમના સુરક્ષા દળોએ કુલ ૫૪ યુક્રેનિયન ડ્રોનને તોડી પાડ્યા અથવા નિષ્કિય કર્યા. આમાંથી, ૨૪ બ્રાયન્સ્કમાં, ૧૨ રોસ્ટોવમાં, ૬ ક્રિમીઆમાં અને અન્ય ડ્રોન કાળા સમુદ્ર, એઝોવ સમુદ્ર અને વિવિધ વિસ્તારોમાં જાવા મળ્યા હતા. આ નવીનતમ ઘટનાક્રમ દર્શાવે છે કે રશિયા-યુક્રેન યુદ્ધ શાંત થવાને બદલે વધુ જટિલ અને ઘાતક બની રહ્યું છે, જેમાં સામાન્ય નાગરિકોના જીવનને સૌથી વધુ અસર થઈ રહી છે.
