સીરિયામાં અશાંતિ અંગે, યુએસ સેક્રેટરી ઓફ સ્ટેટ એન્ટની બ્લિકને પુષ્ટિ કરી કે યુએસ સીરિયન વિદ્રોહી જૂથ હયાત તહરિર અલ-શામ (એચટીએસ) સાથે સંપર્કમાં છે, જેણે બશર અલ-અસદના શાસનને હટાવી દીધું અને દમાસ્કસ પર નિયંત્રણ સ્થાપિત કર્યું. બ્લિકને એમ પણ કહ્યું હતું કે યુએસ અમેરિકન પત્રકાર ઓસ્ટિન ટાઈસને ઘરે લાવવા માટે પ્રતિબદ્ધ છે, જે ૨૦૧૨ થી ગુમ છે.
તમને જણાવી દઈએ કે જાર્ડનમાં પત્રકારો સાથે વાત કરતા બ્લિકને કહ્યું કે અમે એચટીએસ અને અન્ય પક્ષો સાથે સંપર્કમાં છીએ અને અમે ઓસ્ટિન ટાઈસને શોધીને તેને ઘરે લાવવાના મહત્વને બધાની સામે રાખ્યું છે. અમેરિકી વિદેશ મંત્રીએ કહ્યું કે તેમણે સીરિયાના ભવિષ્ય અને પ્રાદેશિક મુદ્દાઓ પર પોતાના વિચારો શેર કર્યા. સીરિયામાંથી રશિયન સૈનિકો પાછા ખેંચવાના અહેવાલો પર ટિપ્પણી કરતા, તેમણે કહ્યું કે તેઓ મીડિયા અહેવાલોને સ્વીકારે છે, પરંતુ વધુ માહિતી આપી નથી. તેમણે વહીવટીતંત્રના અન્ય અધિકારીઓને આ અંગે પૂછપરછ કરવાનો નિર્દેશ આપ્યો હતો.
મધ્ય પૂર્વના પ્રવાસ પર, બ્લિકને બગદાદમાં ઇરાકી વડા પ્રધાન મોહમ્મદ શિયા અલ-સુદાની સાથે સીરિયાના ભવિષ્ય વિશે ચર્ચા કરી. તુર્કીની મુલાકાત બાદ, બ્લિન્કેન બગદાદ પહોંચ્યા, જ્યાં તેમણે આઇએસઆઇએલના પુનરુત્થાન સામેની લડાઈના મહત્વ પર ભાર મૂક્યો. આ સાથે, તુર્કીના વિદેશ પ્રધાન હકાન ફિદાન સાથેની મુલાકાતમાં, તેમણે સીરિયાની આગેવાની હેઠળના સંક્રમણના મહત્વ વિશે વાત કરી.
તેમણે સરમુખત્યારશાહીમાંથી લોકશાહીમાં સીરિયાના સંક્રમણની જરૂરિયાત પર ભાર મૂક્યો હતો જે તમામ લઘુમતીઓ માટે સમાવિષ્ટ અને રક્ષણાત્મક છે. બ્લિકને એમ પણ કહ્યું કે સીરિયાએ આતંકવાદનું કેન્દ્ર ન બનવું જાઈએ અને તેને ઇરાક માટે સ્થિરતા અને સુરક્ષા વધારવાની તક ગણાવી.
તમને જણાવી દઈએ કે હયાત તહરિર અલ-શામની આગેવાની હેઠળના સીરિયન વિદ્રોહી દળોએ દમાસ્કસ પર કબજા કર્યો હતો, ત્યારબાદ બશર અલ-અસદને દેશ છોડવાની ફરજ પડી હતી. તાજેતરમાં, વિપક્ષે મોહમ્મદ અલ-બશીરને વચગાળાના વડા પ્રધાન જાહેર કર્યા, વિદેશમાં વસતા સીરિયન શરણાર્થીઓને તેમની પ્રાથમિકતા ગણાવીને.
