સતત ત્રીજી વખત ભારતના વડાપ્રધાન બન્યા બાદ પીએમ મોદીનો ક્રેઝ ખૂબ જ વધી ગયો છે. વડાપ્રધાન મોદી આવતા અઠવાડિયે યુરોપના પ્રવાસે જવાના છે. આ દરમિયાન તેઓ રશિયા અને ઓસ્ટ્રીયાની મુલાકાત લેશે. વડાપ્રધાન નરેન્દ્ર મોદીના આગમન પહેલા મોસ્કો અને વિયેનામાં તેમના ભવ્ય સ્વાગતની તૈયારીઓ કરવામાં આવી રહી છે. રશિયાના રાષ્ટ્રપતિ કાર્યાલય ક્રેમલિન ઉપરાંત ઓસ્ટ્રીયા પણ પીએમ મોદીના આગમનને લઈને ખૂબ જ ઉત્સુક છે. યુરોપ રવાના થતા પહેલા પીએમ મોદીએ રવિવારે કહ્યું હતું કે ભારત અને ઓસ્ટ્રીયા વચ્ચેના રાજદ્વારી સંબંધોના ૭૫ વર્ષ પૂરા થવાના અવસર પર આ મધ્ય યુરોપિયન દેશની મુલાકાત લેવી ખરેખર સન્માનની વાત છે.
પીએમ મોદીએ આશા વ્યક્ત કરી કે તેમની મુલાકાત દરમિયાન બંને દેશો વચ્ચેના સંબંધોને ગાઢ બનાવવા અને સહયોગના નવા માર્ગો શોધવા પર ચર્ચા થશે. વડા પ્રધાન મોદીએ આૅસ્ટ્રીયાના ચાન્સેલર કાર્લ નેહામરની સોશિયલ મીડિયા પોસ્ટ પર પ્રતિક્રિયા આપતા કહ્યું હતું, જેમાં તેમણે કહ્યું હતું કે તેઓ આવતા અઠવાડિયે વિયેનામાં વિશ્વના સૌથી મોટા લોકતાંત્રિક દેશ ભારતના વડા પ્રધાન નરેન્દ્ર મોદીનું સ્વાગત કરવા માટે ખૂબ જ ઉત્સુક છે. નેહમરે ૭૫ વર્ષની ઉજવણી પર એક પોસ્ટમાં કહ્યું હતું.
“અમને અમારા દ્વિપક્ષીય સંબંધોને વધુ ગાઢ બનાવવાની અને સંખ્યાબંધ ભૌગોલિક રાજકીય પડકારો પર મહાન સહકાર વિશે વાત કરવાની તક મળશે,” નેહમરે કહ્યું. નેહમરની ટિપ્પણીનો જવાબ આપતા વડાપ્રધાન મોદીએ તેમનો આભાર વ્યક્ત કર્યો હતો. “આ ઐતિહાસિક અવસર પર ઓસ્ટ્રીયાની મુલાકાત લેવાનું ખરેખર સન્માનની વાત છે. હું બંને દેશો વચ્ચેના સંબંધોને મજબૂત કરવા અને સહકારના નવા માર્ગો શોધવા પર ચર્ચા કરવા આતુર છું,” મોદીએ ‘ઠ’ પરની પોસ્ટમાં જણાવ્યું હતું. તેમણે કહ્યું કે લોકશાહી, સ્વતંત્રતા અને કાયદાના શાસનના સહિયારા મૂલ્યો એ પાયો છે જેના પર બંને દેશો સાથે મળીને વધુ ગાઢ ભાગીદારી બનાવશે.
વડાપ્રધાન મોદી ૮ અને ૯ જુલાઈના રોજ રશિયાની બે દિવસીય મુલાકાતે જશે, જ્યાં તેઓ ૨૨મી ભારત-રશિયા વાર્ષિક સમિટમાં ભાગ લેશે અને બંને દેશો વચ્ચેના બહુપક્ષીય સંબંધોની સમીક્ષા કરશે. રશિયાના રાષ્ટÙપતિ પુતિન તેમના મિત્ર પીએમ મોદીને મળવા આતુર છે. મોદીના સ્વાગત માટે મોસ્કો અને ક્રેમલિનને દુલ્હનની જેમ સજાવવામાં આવ્યા છે. મોદી રશિયાથી ઓસ્ટ્રીયા જશે. તે ૯ અને ૧૦ જુલાઈએ ઓસ્ટ્રીયામાં રહેશે. ભારતીય વિદેશ મંત્રાલયના જણાવ્યા અનુસાર, ૪૧ વર્ષમાં કોઈ ભારતીય વડાપ્રધાનની ઓસ્ટ્રીયાની આ પ્રથમ મુલાકાત હશે. તેઓ રિપબ્લિક ઓફ ઓસ્ટ્રીયાના રાષ્ટ્રીપતિ એલેક્ઝાંડર વેન ડેર બેલેનને મળશે અને ઓસ્ટ્રીયાના ચાન્સેલર સાથે વાતચીત કરશે. મંત્રાલયના જણાવ્યા અનુસાર, વડાપ્રધાન મોદી અને ચાન્સેલર નેહમર ભારત અને ઓસ્ટ્રીયાના ટોચના ઉદ્યોગ સાહસિકોને પણ સંબોધિત કરશે. મોદી વિયેનામાં ભારતીય સમુદાયના સભ્યો સાથે પણ વાતચીત કરશે.
