દિલ્હીમાં ભૂકંપઃ રાષ્ટ્રીય રાજધાની દિલ્હીની ભૂમિ ફરી એકવાર ભૂકંપના આંચકાથી ધ્રુજી ઉઠી છે. દિલ્હીમાં મોડી રાત્રે ભૂકંપ આવ્યો છે. આ ભૂકંપની તીવ્રતા રિક્ટર સ્કેલ પર ૨.૩ માપવામાં આવી છે. નેશનલ સેન્ટર ફોર સિસ્મોલોજી અનુસાર, રાત્રે ૧:૨૭:૦૧ વાગ્યે દિલ્હીમાં ભૂકંપના આંચકા અનુભવાયા હતા. આ ભૂકંપનું કેન્દ્ર અક્ષાંશઃ ૨૮.૫૩ ઉત્તર, રેખાંશઃ ૭૭.૩૨ પૂર્વ હતું.
ભૂકંપની ઊંડાઈ જમીનથી માત્ર ૫ કિલોમીટર નીચે હતી. તેનું કેન્દ્ર દક્ષિણ પૂર્વ દિલ્હી હતું. શનિવારે મોડી રાત્રે દિલ્હીમાં આવેલા ભૂકંપની તીવ્રતા ખૂબ જ ઓછી હતી. આ કારણે, કોઈ પણ પ્રકારના નુકસાનના સમાચાર નથી. જે સમયે દિલ્હીમાં ભૂકંપ આવ્યો હતો, તે સમયે મોટાભાગના લોકો સૂઈ રહ્યા હતા.
૨૦૨૫ માં દિલ્હી અને એનસીઆરમાં ઘણી વખત ભૂકંપના આંચકા અનુભવાયા છે. આ વર્ષે ૧૭ ફેબ્રુઆરી મહિનામાં દિલ્હીમાં ભૂકંપના આંચકા અનુભવાયા હતા. તેનું કેન્દ્ર દિલ્હીના ધૌલા કુઆનના લેક પાર્ક વિસ્તાર નજીક હતું. આ ભૂકંપ જમીનથી ૫ કિલોમીટરની ઊંડાઈએ આવ્યો હતો.આ ભૂકંપ સવારે ૫ઃ૩૬ વાગ્યે આવ્યો હતો. ૬-૭ સેકન્ડ માટે આંચકા અનુભવાયા હતા. દિલ્હીની સાથે ગુરુગ્રામ, નોઈડા, ફરીદાબાદ અને ગાઝિયાબાદમાં પણ ભૂકંપના આંચકા અનુભવાયા હતા. આ ભૂકંપને કારણે દિલ્હી-એનસીઆરમાં કોઈ પણ પ્રકારનું નુકસાન થયું નથી.
