સોશિયલ મીડિયા પર નફરતનું બજાર ગરમ છે. આનો પુરાવો ભારતમાં ફેસબુક કન્ટેન્ટ પર કરાયેલી કાર્યવાહી છે. ફેસબુકે ભારતમાં ૧.૭૫ કરોડથી વધુ વાંધાજનક સામગ્રી પર કાર્યવાહી કરી છે. આશ્ચર્યની વાત એ છે કે આમાંથી ૩૭ લાખ પોસ્ટ હિંસક છે.
ફેસબુકે મે મહિનામાં વર્ષ ૨૦૨૨માં કરવામાં આવેલી પોસ્ટ અંગેનો રિપોર્ટ જાહેર કર્યો છે. આ અંતર્ગત કહેવામાં આવ્યું છે કે ૧૩ અલગ-અલગ કેટેગરીમાં વાંધાજનક સામગ્રી પર કાર્યવાહી કરવામાં આવી છે. હિંસા, ઉત્પીડન, ગ્રાફિક, જાતીય પ્રવૃતિઓ, નગ્નતા, દબાણ, બાળકોને નુકસાન, તેમને જાખમમાં મૂકવી, ખતરનાક વ્યક્તિઓ અને સંસ્થાઓ અને સ્પામ જેવી પોસ્ટ પર સૌથી કડક કાર્યવાહી કરવામાં આવી છે. આમાં એફબીએ હિંસા સંબંધિત ૩૭ લાખ, ઉત્પીડન સંબંધિત ૨.૯૪ લાખ, આત્મહત્યા અને ઈજા સાથે સંબંધિત ૪.૮૨ લાખ અને આતંક સંબંધિત ૧.૦૬ લાખ પોસ્ટ હટાવી છે.
ફેસબુકને ૧ થી ૩૧ મે સુધીમાં વાંધાજનક સામગ્રી અંગે ૮૩૬ ફરિયાદો મળી છે. આ ફરિયાદોને ગંભીરતાથી લેતા ફેસબુકે તેના પર ૧૦૦ ટકા કાર્યવાહી કરી છે. આ સાથે FB એ એ પણ સ્પષ્ટ કર્યું છે કે તેના પ્લેટફોર્મ પરથી આવી સામગ્રી હટાવવા પાછળનો હેતુ કોઈપણ વ્યક્તિને તમામ પ્રકારના આર્થિક અને સામાજિક નુકસાનથી બચાવવાનો છે. ફેસબુક આ પ્રકારની બાબતને લઈને ખૂબ જ ગંભીર અને સતર્ક છે અને તેના પર તાત્કાલિક પગલાં પણ લઈ રહ્યું છે.
ઈન્સ્ટાગ્રામ અને ટ્વિટર પણ ભારતમાં વાંધાજનક પોસ્ટ સામે કાર્યવાહી કરવામાં પાછળ નથી. મેટા પ્લેટફોર્મ ઈન્સ્ટાગ્રામે ૧૨ કેટેગરીમાં લગભગ ૪૧ લાખ કન્ટેન્ટ સામે કડક કાર્યવાહી કરી છે. મેટાએ તેના નિવેદનમાં કહ્યું છે કે તેનો હેતુ તેના પ્લેટફોર્મ પરથી અન્યને હેરાન કરતી સામગ્રીને દૂર કરવાનો છે. બીજી તરફ ટ્વિટરે પણ તેના ભારતના ટ્રાન્સપરન્સી રિપોર્ટમાં જણાવ્યું છે કે ૨૬ એપ્રિલથી ૨૫ મે ૨૦૨૨ સુધીમાં તેને દોઢ હજારથી વધુ ફરિયાદો મળી છે. આ અંતર્ગત, માર્ગદર્શિકાનું પાલન ન કરવા બદલ ૪૬,૫૦૦ ખાતા સસ્પેન્ડ કરવામાં આવ્યા છે.