શુક્રવારે યુપીના મેરઠ જિલ્લાના ફલાવડા પોલીસ સ્ટેશન વિસ્તારમાં સ્થિત બબ્બલ શાહ અને તેમના અનુયાયીઓની મઝારને નુકસાન થયા બાદ વિસ્તારમાં તણાવ સર્જાયો હતો. પોલીસ અધિક્ષક (ગ્રામીણ) રાકેશ કુમાર મિશ્રાએ જણાવ્યું હતું કે પોલીસને ખેતરમાં સ્થિત મઝારને નુકસાન થયાની માહિતી મળી હતી. તેમણે કહ્યું કે માહિતી મળતાં જ પોલીસ સહિત વરિષ્ઠ અધિકારીઓ ઘટનાસ્થળે પહોંચ્યા હતા અને સ્થાનિક લોકો સાથે વાત કર્યા બાદ ક્ષતિગ્રસ્ત ભાગનું સમારકામ કરવામાં આવ્યું છે. તેમણે કહ્યું કે આ મામલાની તપાસ માટે બે પોલીસ ટીમો બનાવવામાં આવી છે અને કેસ નોંધવામાં આવ્યો છે.
ઘટનાની માહિતી મળતાં જ મોટી સંખ્યામાં લોકો પણ ઘટનાસ્થળે પહોંચ્યા હતા અને કહ્યું હતું કે ધાર્મિક લાગણીઓને ઠેસ પહોંચી છે. ભીડનો આરોપ છે કે આ કૃત્ય ધાર્મિક ઉન્માદ ફેલાવવાના ઈરાદાથી કરવામાં આવ્યું છે. પોલીસે કહ્યું કે નજીકના સીસીટીવી કેમેરાના ફૂટેજની તપાસ કરીને આરોપીઓની ઓળખ કરવાનો પ્રયાસ કરવામાં આવી રહ્યો છે. અહીં, ઘટનાની માહિતી મળ્યા બાદ, સ્થાનિક લોકોએ ફલાવડા પોલીસ સ્ટેશનમાં ફરિયાદ નોંધાવી હતી.
સરધાણા બેઠકના સમાજવાદી પાર્ટીના ધારાસભ્ય અતુલ પ્રધાને આ ઘટનાની નિંદા કરી છે. પ્રધાને કહ્યું કે આ એક દુર્ભાગ્યપૂર્ણ ઘટના છે અને વહીવટીતંત્રે ગુનેગારો સામે કડક અને તાત્કાલિક કાર્યવાહી કરવી જાઈએ. પોલીસ વહીવટીતંત્રનું કહેવું છે કે વિસ્તારમાં શાંતિ જાળવવા માટે પૂરતો પોલીસ દળ તૈનાત કરવામાં આવ્યો છે અને કોઈપણ પ્રકારની અફવાઓ પર ધ્યાન ન આપવા અપીલ કરવામાં આવી છે.
