ભારતીય રિયલ એસ્ટેટમાં રેકોર્ડબ્રેક સોદાએ સમગ્ર દેશને ચોંકાવી દીધો છે. મુંબઈના લક્ઝરી રિયલ એસ્ટેટ માર્કેટમાં, ફાર્મા કંપની યુએસવીના ચેરમેન લીના ગાંધી તિવારીએ ૬૩૯ કરોડ રૂપિયામાં ફક્ત બે ફ્લેટ ખરીદ્યા છે. તેને ભારતમાં અત્યાર સુધીનો સૌથી મોંઘો રહેણાંક એપાર્ટમેન્ટ વેચાણ ગણાવવામાં આવી રહ્યો છે. આ એપાર્ટમેન્ટ વર્લી સી ફેસ પર ૪૦ માળની ઇમારત નમન જાનામાં વેચાયો હતો અને તેનો કુલ વિસ્તાર ૨૨,૫૭૨ ચોરસ ફૂટ છે. તિવારીએ ૩૨મા અને ૩૫મા માળે આ ફ્લેટ ખરીદ્યા છે.
એક અખબારના અહેવાલ અનુસાર, ફાર્મા કંપની લિમિટેડના ચેરમેન લીના ગાંધી તિવારીએ કાર્પેટ એરિયાના આધારે એપાર્ટમેન્ટમાં બે અલ્ટ્રા-લક્ઝરી યુનિટ ૨.૮૩ લાખ રૂપિયા પ્રતિ ચોરસ ફૂટના ભાવે ખરીદ્યા છે. ફ્લેટનું રજિસ્ટ્રેશન આ અઠવાડિયાની શરૂઆતમાં કરવામાં આવ્યું હતું. સમાચાર અનુસાર, તિવારીએ સ્ટેમ્પ ડ્યુટી અને ય્જી્માં ૬૩.૯ કરોડ રૂપિયાથી વધુ ચૂકવ્યા છે. એટલે કે, કુલ ખર્ચ ૭૦૩ કરોડ રૂપિયાથી વધુ હતો. સ્થાનિક બ્રોકર્સ કહે છે કે દેશમાં રહેણાંક સોદા માટે ચૂકવવામાં આવેલી આ અત્યાર સુધીની સૌથી વધુ રકમ છે.
રિયલ એસ્ટેટ નિષ્ણાતો માને છે કે કોવિડ પછીની મિલકતમાં તેજીને કારણે ઘણા ફાર્મા પ્રમોટર્સ અને એક્ઝીક્યુટિવ્સ ઉચ્ચ કક્ષાની મિલકતોને સલામત રોકાણ અને સ્ટેટસ સિમ્બોલ બંને તરીકે જોવા લાગ્યા છે. વધુમાં, દક્ષિણ-મધ્ય મુંબઈમાં દરિયા કિનારે સ્થીત વર્લી, વૈભવી આવાસનું કેન્દ્ર બની ગયું છે. આ મેગા ડીલ ભારતના પ્રીમિયમ રહેણાંક રિયલ્ટીમાં તેના વર્ચસ્વને પ્રતિબિંબિત કરે છે. અરબી સમુદ્રના મનોહર દૃશ્યો અને બાંદ્રા, નરીમાન પોઈન્ટની નિકટતા અને કોસ્ટલ રોડ અને સી લિંક એક્સટેન્શન સાથે, વરલી ભારતના ઉચ્ચ વર્ગના લોકો માટે પ્રિય સ્થળોમાંનું એક છે. આ કારણોસર, અહીં કિંમતો આસમાને છે.
