ભાવનગરના નકલી દારૂકાંડમાં પોલીસની કાર્યવાહી સતત આગળ વધી રહી છે. આ કેસમાં વધુ એક આરોપી પોલીસના હાથે ઝડપાયો છે. પોલીસે ઉમેદસિંહની ધરપકડ કરીને તેને કોર્ટમાં રજૂ કર્યો હતો. કોર્ટમાં રજૂઆત બાદ ઉમેદસિંહના ૭ સપ્ટેમ્બર સુધીના પોલીસ રિમાન્ડ મંજૂર કરવામાં આવ્યા છે. વધુ એક આરોપીની ધરપકડ થતાં આ કેસમાં કુલ આરોપીઓની સંખ્યા હવે ૩૮ થઈ ગઈ છે. પોલીસ દ્વારા આરોપીઓની પૂછપરછ કરીને નકલી દારૂકાંડ સાથે જાડાયેલી વધુ કડીઓ શોધવાનો પ્રયાસ કરવામાં આવી રહ્યો છે.
ગઈકાલે નકલી દારૂકાંડના મુખ્ય સૂત્રધાર સહિત કુલ ૧૪ આરોપીઓને જેલ હવાલે કરવામાં આવ્યા હતા. બીજી તરફ, આવતીકાલે વધુ ૧૩ આરોપીઓના રિમાન્ડ પૂર્ણ થઈ રહ્યા હોવાથી તેમને પણ કોર્ટમાં રજૂ કરવામાં આવશે. આ કેસમાં ધરપકડ કરાયેલા ૩૮ આરોપીઓ પૈકી ૧૦ આરોપીઓના પોલીસ રિમાન્ડ ૭ સપ્ટેમ્બરના રોજ પૂર્ણ થશે. ત્યારબાદ તેમને પણ કોર્ટમાં રજૂ કરવામાં આવશે. એટલે આગામી દિવસોમાં કોર્ટની કાર્યવાહી અને પોલીસ તપાસ બંને મહત્વની રહેશે.
આ સમગ્ર નકલી દારૂકાંડમાં એસએમસી એટલે કે સ્ટેટ મોનિટરિંગ સેલની તપાસ પણ યથાવત છે.એસએમસી આઇજી ગગનજીત ગંભીરની દેખરેખ હેઠળ ચાલી રહેલી તપાસમાં અત્યાર સુધી કોઈ મોટો ખુલાસો થયો નથી. તપાસના ભાગરૂપે છેલ્લા પાંચ દિવસ સુધી પોલીસ અધિકારીઓ અને પોલીસ કર્મચારીઓના નિવેદનો લેવામાં આવ્યા હતા. આ દરમિયાન નકલી દારૂકાંડને લઈને પોલીસની ભૂમિકા સહિત અન્ય મુદ્દાઓ પર માહિતી એકત્ર કરવામાં આવી રહી છે.
બે દિવસ પહેલાં આઇજી ગગનજીત ગંભીર ફરી એક વખત અચાનક ભાવનગર પહોંચ્યા હતા. તેમની આ મુલાકાતને કારણે તપાસને લઈને અનેક ચર્ચાઓ ચાલી રહી છે. જાકે, પોલીસની ભૂમિકા અને બુટલેગરો સાથેના કનેક્શન અંગે હજુ સુધી કોઈ મોટો ખુલાસો સામે આવ્યો નથી. તપાસ એજન્સીઓ આ કનેક્શન અંગે માહિતી એકત્ર કરી રહી છે અને આગામી દિવસોમાં આ મામલે શું બહાર આવે છે તેના પર સૌની નજર રહેશે.
નકલી દારૂકાંડમાં અગાઉ પોલીસ વિભાગ સામે પણ કાર્યવાહી કરવામાં આવી હતી. આ કેસમાં અગાઉ બે પીઆઇ સહિત કુલ પાંચ પોલીસ કર્મચારીઓને સસ્પેન્ડ કરવામાં આવ્યા હતા. પોલીસ કર્મચારીઓની ભૂમિકા સામે સવાલો ઉઠ્યા બાદ આ કાર્યવાહી કરવામાં આવી હતી. હવે એસએમસી અને એસઆઇટી દ્વારા આ સમગ્ર મામલે તપાસ કરવામાં આવી રહી છે. ખાસ કરીને નકલી દારૂના નેટવર્ક પાછળ કોની ભૂમિકા હતી અને તેને મદદ કરનાર લોકો કોણ હતા તે દિશામાં પણ તપાસ ચાલી રહી છે.
ભાવનગરના આ નકલી દારૂકાંડની અસર મોટી સંખ્યામાં લોકો પર થઈ હતી. અત્યાર સુધીની માહિતી પ્રમાણે આ ઘટનામાં આશરે ૬૦ જેટલા લોકો અસરગ્રસ્ત થયા હતા, જ્યારે ૧૩ લોકોના મોત થયા છે. ઘટનાની ગંભીરતાને જાતા એસએમસી અને એસઆઇટી બંને તરફથી તપાસ ચાલુ રાખવામાં આવી છે. એક તરફ પોલીસ દ્વારા આરોપીઓની ધરપકડ કરીને કોર્ટમાં રજૂ કરવામાં આવી રહ્યા છે, તો બીજી તરફ પોલીસની ભૂમિકા અને બુટલેગરો સાથેના કનેક્શનની પણ તપાસ કરવામાં આવી રહી છે. હાલમાં આ કેસમાં કુલ ૩૮ આરોપીઓ સામે કાર્યવાહી થઈ ચૂકી છે. ઉમેદસિંહના ૭ સપ્ટેમ્બર સુધીના પોલીસ રિમાન્ડ મંજૂર થયા છે, જ્યારે અન્ય આરોપીઓના રિમાન્ડ પણ આગામી દિવસોમાં પૂર્ણ થવાના છે. તેથી તેમની પૂછપરછમાંથી પોલીસને શું માહિતી મળે છે તે મહત્વનું રહેશે.
