બાંગ્લાદેશ ક્રિકેટ બોર્ડે સ્ટાર ઓલરાઉન્ડર શાકિબ અલ હસનને સ્થાનિક અને આંતરરાષ્ટ્રીય એમ બંને રાષ્ટ્રીય ફેડરેશનો દ્વારા આયોજિત તમામ આઇસીસી દ્વારા માન્ય ટૂર્નામેન્ટમાં બોલિંગ કરવાથી સસ્પેન્ડ કરી દીધા છે. આ પહેલા ઈંગ્લેન્ડ અને વેલ્સ ક્રિકેટ બોર્ડે પણ શાકિબને બોલિંગ કરવાથી સસ્પેન્ડ કરી દીધો હતો. બીસીબીએ કહ્યું છે કે શાકિબ ટૂંક સમયમાં માન્ય ટેસ્ટીંગ સેન્ટરમાં ફરી ટેસ્ટ માટે હાજર થશે. જેથી તેની કાર્યવાહીને મંજૂરી મળી શકે અને તેનું સસ્પેન્શન દૂર કરી શકાય. તેણે ટેસ્ટ અને ટી૨૦માંથી નિવૃત્તિ લઈ લીધી છે.
સપ્ટેમ્બરમાં કાઉન્ટી ચેમ્પિયનશિપમાં ક્રિકેટ મેચ દરમિયાન શંકાસ્પદ બોલિંગ એક્શન માટે તેની જાણ કરવામાં આવી હતી, આ મહિનાની શરૂઆતમાં, તે આઇસીસી દ્વારા માન્યતા પ્રાપ્ત પરીક્ષણ કેન્દ્ર લોફબોરો યુનિવર્સિટી ખાતે તેની એક્શન ટેસ્ટમાં નિષ્ફળ ગયો હતો. આ પછી ઇસીબીએ મોટી કાર્યવાહી કરી અને તેના પર બોલિંગ કરવા પર પ્રતિબંધ લગાવી દીધો. હાલમાં, શાકિબ ઘરેલુ અને આંતરરાષ્ટ્રીય ક્રિકેટના તમામ ફોર્મેટમાં બેટ્સમેન તરીકે રમી શકે છે.
શાકિબ અલ હસન માટે છેલ્લા કેટલાક મહિનાઓ ખૂબ જ ખરાબ રહ્યા છે. જ્યારે વિદ્યાર્થીઓના વિરોધને કારણે તેમની પાર્ટી બાંગ્લાદેશ અવામી લીગની સરકાર પડી ગઈ હતી. આ પછી તે ઢાકામાં રમીને પોતાની ટેસ્ટ કારકિર્દીનો અંત કરવા માંગે છે, પરંતુ તે બાંગ્લાદેશમાં એક હત્યા કેસમાં આરોપી છે. આ કારણોસર તે બાંગ્લાદેશ પરત ફર્યો ન હતો. અત્યારે તે માત્ર વનડે રમી રહ્યો છે, પરંતુ અફઘાનિસ્તાન અને વેસ્ટ ઈન્ડીઝ શ્રેણી માટે તેની પસંદગી કરવામાં આવી નથી. તે હાલમાં લંકા ટી ૧૦ ટૂર્નામેન્ટમાં રમી રહ્યો છે.શાકિબ અલ હસન બાંગ્લાદેશ માટે ત્રણેય ફોર્મેટમાં ક્રિકેટ રમ્યો છે અને તેણે બાંગ્લાદેશ માટે ૭૧ ટેસ્ટમાં ૪૬૦૯ રન બનાવ્યા અને ૨૪૬ વિકેટ લીધી. તેના નામે ૨૪૭ વનડે મેચોમાં ૭૫૭૦ રન અને ૩૧૭ વિકેટ છે. તેણે બાંગ્લાદેશ માટે ૧૨૯ ટી ૨૦ આંતરરાષ્ટ્રીય મેચોમાં ૨૫૫૧ રન અને ૧૪૯ વિકેટ લીધી છે.
