ત્રણ જિલ્લાની સરહદે આવેલા વડીયા શહેરની ત્રીસ વર્ષ જૂની બગસરા-વડીયા-રાજકોટ બસ સેવા બંધ થતાં લોકોને ભારે હાલાકી ભોગવવી પડી રહી છે. આ રૂટ પર બપોરે ૧૨ઃ૩૦ કલાકે બગસરાથી નીકળતી બસ ૧ઃ૪૫ કલાકે વડીયા થઈને રાજકોટ જતી હતી. વિધાનસભાના નાયબ મુખ્ય દંડક કૌશિકભાઈ વેકરીયાના લોકદરબારમાં રજૂઆત બાદ શરૂ કરાયેલી સેવા ફરી બંધ કરાતાં લોકોમાં રોષ ફેલાયો છે. આ ઉપરાંત વડીયા-જેતપુર વચ્ચે રાત્રે ૯ વાગ્યે બંને તરફથી બસ સેવાની માંગણી અને અમરેલી-ઉપલેટા રૂટ પર વધતા ટ્રાફિકને કારણે મિની બસને બદલે મોટી બસની જરૂરિયાત હોવાની માંગ કરવામાં આવી હતી. વડીયા એ અમરેલી જિલ્લાનું છેવાડાનું તાલુકા મથક છે, જ્યાંથી લોકો ખરીદી કરવા, સારવાર માટે હોસ્પિટલોમાં અને ખેત પેદાશોના વેચાણ માટે જેતપુર, ગોંડલ અને રાજકોટ જતા હોય છે. આ પરિસ્થિતિમાં લોકો અધિકારીઓ અને ચૂંટાયેલા પ્રતિનિધિઓ પાસેથી યોગ્ય પગલાંની અપેક્ષા રાખી રહ્યા છે.
