બગસરા પેસેન્જર એસોસિએશને આજે સ્થાનિક બસ ડેપોના મેનેજરને એક આવેદનપત્ર સુપરત કર્યું હતું, જેમાં ડેપો અને બસ સેવાઓને લગતી વિવિધ સમસ્યાઓ અંગે ચિંતા વ્યક્ત કરવામાં આવી હતી. આવેદનપત્રમાં મુખ્યત્વે બગસરાથી રાજકોટ જતી બસોના માર્ગ અંગે ફેરફાર કરવાની માગણી કરવામાં આવી છે. હાલમાં રસ્તાનું કામ ચાલુ હોવાને કારણે ગોંડલ બસ સ્ટેશન તરફ ૧૮ કિલોમીટરનું લાંબુ ડાયવર્ઝન આપવામાં આવ્યું છે, જેના કારણે મુસાફરોને રાજકોટ પહોંચવામાં વધુ સમય લાગે છે. આ સમસ્યાના નિવારણ માટે એસોસિએશને સૂચવ્યું છે કે બગસરાથી રાજકોટ જતી તમામ બસો ગોંડલ બસ સ્ટેશનને બાયપાસ કરે અને પરત આવતી વખતે જ ત્યાંથી પસાર થાય. ઉપરાંત, આવેદનપત્રમાં બગસરા ડેપોની સફાઈ વ્યવસ્થા સુધારવા, બંધ પડેલી લાઇટો અને ડિજિટલ બોર્ડ ચાલુ કરવા, અને રિપેર માટે આપેલા પંખાઓ ફરીથી લગાવવાની માગણી કરવામાં આવી છે. નોંધનીય છે કે, આ સમસ્યાઓના કારણે મુસાફરો પરેશાન થઈ રહ્યા છે અને ઘણા લોકો ખાનગી વાહનોનો સહારો લેવા મજબૂર બન્યા છે. આનાથી ડેપોની આવક પણ ઘટી રહી છે.
