બગસરામાં ભાજપના કાર્યકર અને શિક્ષણ સમિતિના ચેરમેનના પતિ પર જમવાનું બનાવવા બાબતે માથાકૂટ થતાં ભાજપ કાર્યાલયની નીચે જ પાંચ લોકો દ્વારા હુમલો કરવામાં આવ્યો હતો. બગસરામાં તાલુકા ભાજપ કાર્યાલય નીચે ખાણીપીણીનો વેપાર કરતા ભાજપના સક્રિય કાર્યકર અને શિક્ષણ સમિતિના ચેરમેનના પતિ જયંતિભાઈ મકવાણા પર ખાણીપીણીની વસ્તુ બાબતે માથાકૂટ કરી સુરાભાઈ કાઠી રહે. ભાયાવદર તા. ધારી, શિવભાઈ ભાયાભાઈ જાતવડા રહે. ભાયાવદર, ક્રિપાલભાઈ વાળા રહે. બગસરા, શિવાંગભાઈ દેવમુરારી રહે. નદીપરા, બગસરા તથા એક અજાણ્યા વ્યક્તિ દ્વારા જયંતિભાઈ મકવાણા તથા તેમના પુત્ર સાહેદ સાથે ખાણીપીણીની વસ્તુ આપવા બાબતે માથાકૂટ કરી જાનથી મારી નાખવાની ધમકી આપી હતી. થાળી વડે જયંતિભાઈને માથાના ભાગે મારતા તેમને ગંભીર હાલતમાં બગસરા અને ત્યારબાદ અમરેલી સિવિલ હોસ્પિટલ ખાતે રિફર કરવામાં આવ્યા હતા. આ બાબતે પોલીસ દ્વારા બીજા દિવસે ફરિયાદ નોંધવામાં આવી હતી. ભાજપના કાર્યકર પર ભાજપ કાર્યાલય નીચે જ આવો હુમલો કરવામાં આવ્યો હોય તેમ છતાં પોલીસ દ્વારા કોઈ કાર્યવાહી કરવામાં ન આવતા ગુનો કરેલ લોકોની તાત્કાલીક ધરપકડ કરવાની માંગ સાથે ઘણા લોકો પોલીસ સ્ટેશનને પણ દોડી ગયા હતા.
