બગસરા નગરપાલિકાની ઘોર બેદરકારીને કારણે શનિવારે સવારે એક દુર્ભાગ્યપૂર્ણ ઘટના બની, જેમાં બે ગાયોના વીજ કરંટથી મોત નીપજ્યા. પણ આ ઘટનામાં ગાયોના માલિકનો આબાદ બચાવ થયો. નગરપાલિકા દ્વારા સ્ટ્રીટ લાઈટ ફિટિંગમાં વાયરના જોડાણ વખતે યોગ્ય સુરક્ષા ઉપાયો ન અપનાવવાને કારણે આ દુર્ઘટના સર્જાઈ. શહેરના નદીપરા વિસ્તારમાં નનુભાઈ રૈયાભાઈ ભરવાડના વાડામાં બાંધેલી બે ઊંચી કિંમતની ગાયો, વાડાના લોખંડના દરવાજા સાથે સ્ટ્રીટ લાઇટના વીજવાયરના સંપર્કમાં આવતાં મૃત્યુ પામી. આ ઘટનામાં નનુભાઈ પોતે પણ માંડ માંડ બચ્યા. જ્યારે તેઓ વાડામાં પ્રવેશ્યા, ત્યારે તેમને પણ વીજ કરંટ લાગ્યો, પરંતુ સદભાગ્યે તેઓ દૂર ફેંકાઈ જતાં બચી ગયા. આ ઘટનાએ નગરપાલિકાની કામગીરી સામે ગંભીર પ્રશ્નો ઉભા કર્યા છે. સ્થાનિક લોકોની માંગ છે કે પાલિકા તાત્કાલિક સમગ્ર શહેરમાં સ્ટ્રીટ લાઇટના વીજવાયરોની ચકાસણી કરે જેથી ભવિષ્યમાં આવી દુર્ઘટનાઓ ટાળી શકાય.
