બંગાળની ખાડી પર બનેલ ‘લો પ્રેશર એરિયા’ ૨૩ ઓક્ટોબર (બુધવાર) સુધીમાં ચક્રવાતી તોફાનમાં ફેરવાઈ શકે છે. ભારતીય હવામાન વિભાગે આ માહિતી આપી છે. ચક્રવાતી તોફાન ઓડિશા અને પશ્ચિમ બંગાળના દરિયાકિનારાને અસર કરી શકે છે. હવામાન વિભાગ અને સ્થાનિક વહીવટીતંત્રે માછીમારોને સોમવાર સુધીમાં દરિયાકિનારા પરથી પાછા ફરવાની સલાહ આપી છે.
હવામાન વિભાગે આ ચક્રવાતી તોફાનને ‘દાના’ નામ આપ્યું છે, તેની સાથે ઘણા રાજ્યોના હવામાનમાં નોંધપાત્ર ફેરફાર થશે. હવામાન વિભાગે દેશના ઘણા ભાગોમાં વરસાદનું એલર્ટ પણ જારી કર્યું છે. ચક્રવાતના લેન્ડફોલનું ચોક્કસ સ્થાન હજુ સુધી જાણી શકાયું નથી. એક રિપોર્ટ અનુસાર આ ચક્રવાત પુરીમાં લેન્ડફોલ કરી શકે છે. ભારતીય હવામાન વિભાગે જણાવ્યું હતું કે ઉત્તર આંદામાન સમુદ્ર અને અડીને આવેલા બંગાળની ખાડી પર બનેલા ચક્રવાતને કારણે પૂર્વ-મધ્ય બંગાળની ખાડી અને નજીકના ઉત્તર આંદામાન સમુદ્ર પર નીચા દબાણનો વિસ્તાર બન્યો છે.
આઇએમડીએ કહ્યું, ‘બંગાળની ખાડીમાંથી ઉદ્દભવતું આ ચક્રવાત પશ્ચિમ-ઉત્તરપશ્ચિમ તરફ આગળ વધશે અને મંગળવારે સવારે વધુ તીવ્ર બનશે. બુધવાર, ૨૩ ઓક્ટોબર સુધીમાં તે પૂર્વ-મધ્ય બંગાળની ખાડી પર ચક્રવાતી વાવાઝોડામાં પરિવર્તિત થવાની સંભાવના છે.
હવામાન વિભાગે જણાવ્યું હતું કે આ વાવાઝોડું ઉત્તર-પશ્ચિમ દિશામાં આગળ વધીને ૨૪ ઓક્ટોબરની સવાર સુધીમાં ઓડિશા અને પશ્ચિમ બંગાળના દરિયાકાંઠે ઉત્તર-પશ્ચિમ બંગાળની ખાડીમાં પહોંચવાની ઉચ્ચ સંભાવના છે. હવામાન વિભાગે કહ્યું કે દરિયાકાંઠાના કેટલાક સ્થળોએ ૨૪-૨૫ ઓક્ટોબરે ૨૦ સેમી વરસાદ પડી શકે છે. વરસાદની તીવ્રતા ૨૦ થી ૩૦ સેમી સુધી વધી શકે છે. ચક્રવાતી વાવાઝોડાને કારણે કેટલીક જગ્યાએ ૩૦ સેમીથી વધુ વરસાદ પડી શકે છે.
ચક્રવાતને કારણે કટક, નયાગઢ, કંધમાલ અને ગજપતિમાં ભારે વરસાદની ચેતવણી જારી કરવામાં આવી છે. આ વિસ્તારોમાં ગાજવીજ સાથે ભારે વરસાદની સંભાવના છે. આ સાથે પશ્ચિમ બંગાળના પૂર્વ મેદિનીપુર, પશ્ચિમ મેદિનીપુર, દક્ષિણ ૨૪ પરગણા અને ઉત્તર ૨૪ પરગણામાં ભારે વરસાદનું એલર્ટ આપવામાં આવ્યું છે. હવામાન વિભાગે કહ્યું કે કોલકાતા, હાવડા, હુગલી અને ઝારગ્રામમાં ૨૩ થી ૨૪ ઓક્ટોબર વચ્ચે ભારે વરસાદ પડી શકે છે. કોલકાતા હવામાન કચેરીએ જણાવ્યું હતું.
